Taxi driver na holdaper, arestado
MANILA, Philippines – Arestado ang isang taxi driver na holdaper matapos biktimahin ang tatlong pasahero nitong Chinese, kahapon sa Pasay City.
Nakakulong ngayon sa Pasay City Police ang suspect na si Fredelino Amido, 43, ng Bagong Barrio, Caloocan City, habang pinaghahanap naman ang kasabwat nitong si Ricardo Villaren.
Kinilala naman ang mga biktima na sina Qing Chen, 31; Ling Hui, 47 at Yanni Liao, 31.
Ayon sa report na natanggap ng hepe ng Pasay City Police na si P/Colonel Bernard Yang, alas-3:30 ng madaling araw nang sumakay ang mga biktima sa taksing pinapasada ng suspect, Richmelyn Taxi na ( AA14919) sa tapat ng isang supermarket sa kahabaan ng Diosdado Macapagal Boulevard kung saan magpapahatid ang mga ito sa kanilang tinutuluyang hotel sa Mandaluyong City.
Hindi pa nakakalayo ang mga ito, nang itigil ng suspect ang pinapasada nitong taxi at sumakay sa unahan ang kasabwat na si Villaren at dito na nagdeklara ng holdap gamit ang replikang baril.
Nilimas ng mga suspect ang cellphone, pera at personal na gamit ng mga biktima, ngunit tiyempo namang nagpapatrolya ang mga pulis at namataan ang komosyon mula sa nabanggit na taxi.
Agad itong nirespondehan kung saan nadakip pagkakadakip kay si Amido habang mabilis naman nakatakas ang kasama nitong si Villaren.
Inihahanda na ng Pasay City Police ang mga kasong isasampa laban sa nabanggit na suspect.
- Latest