Manila Bay binakuran na ng DENR
MANILA, Philippines — Binakuran na ng Department of Environment and Natural Resources ang 1.5 kilometro na kahabaan ng Manila Bay bilang bahagi ng rehabilitasyon at panimula sa paglalagay ng tubo para sa maayos na sewerage system na pipigil sa polusyon sa tubig ng baybayin.
Ayon kay DENR Secretary Roy Cimatu, ipinuwesto ang harang na bakal simula sa US Embassy hanggang Manila Yacht Club na sumasakop sa mga estero ng Padre Faura, Remedios at De Abad na aniya ay kabilang sa mga nagpaparumi sa tubig ng Manila Bay.
Ang ikakabit na tubo ang magiging daluyan umano ng tubig sa paglilinis nila ng mga basura sa baybayin.
Bukod sa mga inaanod na basura, inaasahang makapal na burak umano ang mahahakot mula sa ilalim ng dagat, dahilan upang mabansagan ito bilang “Burakay.”
Sa idinaos na media forum sa Kapihan sa Manila Bay kahapon, sinabi ng kalihim na layon din ng ilalagay nilang harang na mapigilan ang mga taong lumangoy sa baybayin habang hindi pa nila ito idinideklarang lubusang malinis at ligtas na gawing public swimming pool.
Ibinunyag din nito na 65 establisimyento pa sa paligid ng Manila Bay ang posibleng maipasara nila dahil sa paglabag sa mga batas pangkapaligiran na pangunahin aniyang dahilan ng polusyon.
Kasabay nito’y tiniyak naman ni DENR Undersecretary Benny Antiporda na hindi paaalisin sa kanilang mga tirahan ang mga residente ng Baseco sa Maynila habang isinasagawa ang rehabilitasyon ng Manila Bay.
Magtatayo aniya sila ng temporary communal septic tank sa iba’t ibang bahagi ng compound para hindi tumapon sa baybayin ang kanilang mga dumi.
Samantala, paaalisin naman ng DENR ang mga informal settler na nasa paligid ng baybayin sa Cavite upang bigyang-daan ang paglilinis sa bahaging ito ng Manila Bay. Sinabi ni Antiporda na bibigyan naman nila ng maayos na relokasyon ang mga paaalising informal settler.
- Latest
