Expired Noche Buena products, nasamsam

MANILA, Philippines — Nasamsam ng pinagsanib na puwersa ng Regional Mobile Force Battalion (RMFB) – NCR at Food and Drugs Administration-Regulation Enforcement Unit (FDA-REU) ang mga expired na Noche Buena items sa ginawang pagsalakay sa mga ambulant vendors sa Quiapo, Maynila.

Sunud-sunod na sinuyod ng puwersa ang mga stalls sa panulukan ng Villalobos at Carlos Palanca St.  kamakalawa kung saan kinumpiska ang mga processed food products na natuklasang mga expired na.

Kasama rin sa isinagawang operasyon na nagsilbing security at tactical support ang mga tauhan ng NCRPO.

Kabilang sa mga nasamsam na items ay mga Noche Buena items katulad ng keso de bola, margarine, sweet tomato catsup, spaghetti sauce, keso, kape at mga cream na lalagyan ng label ng mga kilalang kompanya.

Dahil dito nagpaalala ang mga awtoridad sa publiko na maging maingat sa pagbili  dahil marami ang nagta-tampered sa iba’t ibang produkto na ibinebenta lalo na sa mga bangketa.