Parak bulagta sa tandem
MANILA, Philippines - Patay na nang idating sa Amang Rodriguez Memorial Medical Center (ARMMC) ang isang pulis makaraang pagbabarilin ng riding-in-tandem suspects sa parking lot ng isang sabungan, kamakalawa ng gabi sa Marikina City.
Kinilala ang nasawi na si SPO2 Gilbert Peralta, nakadestino sa Criminal Investigation and Detection Group (CIDG) sa Quezon City sanhi ng tinamong tama ng bala ng baril sa ulo at dibdib.
Ayon kay Senior Superintendent Roberto Fajardo, hepe ng CIDG’s National Capital Region (NCR), patuloy pa nilang inaalam ang motibo sa naganap na krimen.
Ayon sa report, ang biktima ay nagsasagawa umano ng surveillance operations sa lugar nang ito ay pagbabarilin nang malapitan ng mga suspek.
Naganap ang insidente sa parking area ng San Roque cockpit arena sa Brgy. San Roque kamakalawa ng gabi.
May ulat din naman na sinasabing ang biktima ay siya umanong sponsor ng cockfighting derby.
Nabatid na patungo si SPO2 Peralta sa kanyang asul na Toyota Fortuner nang ito ay lapitan ng gunman at pagbabarilin sa ulo at dibdib.
Kaswal lang na naglakad ang gunman at tinungo ang kasama na naghihintay sa kulay gray na motorsiklo na walang plaka at tumakas patungo sa Marcos Highway.
- Latest