MANILA, Philippines - Namatay habang ginagamot sa ospital ang isang vendor matapos makipagsuntukan sa isang menor-de- edad sa Quezon City kamakalawa ng hapon.
Idineklarang patay bandang alas-11:30 kamakalawa ng gabi ang biktimang si Ruben Badajos, 36, pansamantalang naninirahan sa bangketa ng Alpha theater sa kahabaan ng Aurora Blvd., Quezon City sanhi ng tinamong sugat sa ulo at sa kamay.
Habang nasa pangangalaga ngayon ng Department of Social Welfare and Developmet ang itinuturong responsable sa krimen na si Jayjay Mutya Escalante, 16, out-of-school youth at pansamantala ring nanunuluyan sa Nepa Q-mart sa Cubao, Quezon City matapos itong arestuhin.
Batay sa ulat, nangyari ang insidente pasado alas-3:10 kamakalawa ng hapon sa harapan ng Rojet Internet Café sa Brgy. E. Rodriguez, Cubao.
Nauna rito, nagkaroon umano ng mainitang pagtatalo ang dalawa hanggang sa mauwi sa suntukan at mapatumba umano ng suspek ang biktima. Dahil dito, agad na umawat sina Jake de Leon at Roberto Cruz at dinala ang sugatang biktima sa lobby ng Alpha theater at doon pinaupo.
Bandang alas-9:30 ng gabi ay napansin ng mga kasamahan na tila hindi na umano humihinga ang biktima kung kaya’t mabilis nila itong isinugod sa QMMC hanggang sa bawian ito ng buhay.