PNP umiskor: 3 holdaper timbog

Nakaiskor kahapon ang aw­to­­ridad laban sa mga notor­yus na mga miyembro ng holdup and robbery syndicate maka­raang masakote ang tatlo sa mga ito ng mga elemento ng Mobile Patrol Group (MPG) sa aktong hino­holdap ang isang emple­yada, kahapon ng ma­daling-araw sa Taguig  City.

Kinilala si Supt. Alfred Corpus, hepe ng Taguig City Police ang mga naarestong suspect na sina Bobby Sausa, 29; Jonito Calton, 27 at Vicente Guinoo, 35, pawang mga resi­dente ng PNR Site na ilang metro lamang ang layo mula sa gusali ng TESDA.

Batay sa ulat ni P/Chief Insp. Eufronio Obong Jr., may hawak ng kaso, dakong alas-4:30 ng ma­daling-araw nang unang bik­timahin ng mga suspect ang isang pasahero sa ha­rapan ng gusali ng TESDA na nasa East Service Road, Brgy. Western  Bicutan, Taguig  City.

Nabatid na habang naghi­hintay ng masasakyan ang bik­tima na si Rose Buenavides, nang bigla na lamang lapitan ng tatlong armadong lalaki at agad na nagdeklara ng holdap.

Tiyempo namang nagpa­patrolya sa lugar ang mga tauhan ng MPG-Taguig kung saan naaktuhan nila ang pang­hohol­dap ng mga suspect sa biktima.

Tinangka namang manla­ban ng biktima kung kaya’t galit na sinaksak ito ng isa sa mga suspect sa kanyang kanang braso.

Dito agad na nakapa­gres­ponde ang mga awtoridad kung saan nailigtas ang biktima at na­dakip ang mga suspect.

Samantala, upang tiyakin ang kaligtasan ng mga commuters sa lugar, inatasan ni Mayor Sigfrido Tinga si Supt. Corpus at MPG-Taguig chief Eduardo Ma­riano na magsa­gawa ng regular na pag­ pa­patrolya bunga na rin ng mga sunud-sunod na hol­dapan sa harapan ng TESDA Building kung saan malimit na na­bi­bik­tima ay mga kawani o aplikante rito. (Rose Tamayo-Tesoro)