Ginagalugad ngayon ng mga tauhan ng Quezon City Police ang mga pagamutan at klinika sa lugar na kanilang nasasakupan matapos na sugatang tumakas ang isa sa tatlong mga holdaper na kanilang nasagupa kahapon ng umaga sa nabanggit na lungsod.
Ang hakbang ay ibinigay ni QCPD District director Senior Supt. Magtanggol Gatdula matapos ang naganap na shootout kahapon.
Kasabay nito, nanawagan din si Gatdula sa mga tauhan ng mga pagamutan na agad makipag ugnayan sa pulisya kapag may pasyenteng dinala sa kanilang pagamutan na may nasugatan dahil sa tama ng bala ng baril.
Ayon sa Quezon City Police District (QCPD) Mobile Unit naispatan ng mga pulis ang Toyota Corolla car (THV 750) na dala ng mga suspek dakong alas-10 ng umaga sa tapat ng isang grocery store sa Cubao Area.
Una nang sinita ang mga suspect dahil sa matinding pagka- tint ng salamin ng sasakyan at dahil na rin sa kahina-hinalang kilos ng mga ito. Gayunman, agad na pinaputukan ng mga suspect ang awtoridad na humantong sa gun-running battle.
Nakorner ng mga pulis ang sasakyan ng mga suspek sa may Hemady St. sa kanto ng 3rd st. New Manila Q.C., pero mabilis din silang naka-eskapo. Isang Pajero (WRH-719) na pag-aari ni Ronald Arroyo ang hinumander ng mga suspect na ginamit sa tuluyang pagtakas. Sinasabing ang grupo ay kabilang sa “Sibuyas Gang” at isa sa mga tumakas ang tinamaan at nasugatan ng mga pulis. (Angie dela Cruz)