Nasawi noon din ang biktimang si Romulo Tarug, 36, nakatira sa #735 5th St., Pildera II, Brgy. 193, sanhi ng tama ng bala sa katawan buhat sa hindi pa batid na kalibre ng baril.
Tumakas naman kaagad ang suspect na si PO3 Ferdinand Gran, nakatalaga sa K9 Unit, Aviation Security Group, matapos isagawa ang pamamaril.
Sa pagsisiyasat ng pulisya, naganap ang insidente dakong alas-9:30 ng gabi sa isang sari-sari store na pag-aari ni Ester Gaboy na matatagpuan sa Pildera II, Brgy. 193, Pasay City.
Ayon kay Gaboy, kasama ng suspect si SPO2 Radem Fantony, 47, at nag-iinuman sa sari-sari store nito.
Dumating naman ang biktima upang bumili ng sigarilyo. Ilang saglit pa ay kumuha ito ng barya at inihulog sa videoke na pag-aari rin ni Gaboy. Habang kumakanta ang biktima, biglang lumapit dito si PO3 Gran at walang sabi-sabing pinaputukan na naging sanhi ng agaran nitong kamatayan.
Nabatid na naasar ang suspect sa pagkanta nang sintunado ng biktima. Sa ngayon ay patuloy pang iniimbestigahan ang nasabing kaso. (Lordeth Bonilla)