Pulis, 4 pa tiklo sa abortion

Lima katao kabilang ang isang bagitong pulis at isang abortionist na sangkot sa abortion activities ang dinakip ng mga awtoridad sa isinagawang entrapment operation kamakalawa ng gabi sa Pasay City.

Sa ulat ng pulisya, kinilala ang mga nadakip na sina PO1 Allan Bugayong, 32, nakatalaga sa NCRPO, maintainer at protector ng grupo; Margie Catipon, 26, abortionist; Lanie Santos, 45; Marnela Ramilo, 32; at Maricar Villanueva, 28.

Nabatid sa ulat na nakatanggap ng maraming reklamo ang tanggapan ng Counter Intelligence ng Southern Police District (SPD) tungkol sa aktibidades ng grupo.

Dakong alas-3 ng hapon ng ihanda ang isang bitag laban sa mga ito sa 124 Cuneta Avenue, Pasay City na nagresulta sa pagkaaresto sa mga suspect.

Nasamsam sa mga nadakip ang mga abortion paraphernalias; P5,000 marked money, 2 cellphone, isang .45 pistol, mga bala at ID ni PO1 Bugayong.

Inihahanda na ang kaukulang kaso laban sa mga nadakip. (Lordeth Bonilla)