Doktor tiklo sa abortion

Bagsak kalaboso ang isang tiwaling doktor matapos itong masakote ng mga operatiba ng Philippine National Police-Criminal Investigation and Detection Group (PNP-CIDG) sa aktong nagsasagawa ng ‘abortion’ sa isa nitong pasyente sa loob ng kaniyang klinika sa isinagawang operasyon sa Quezon City.

Kinilala ni PNP-CIDG Director P/Chief Supt . Arturo Lomibao ang nasakoteng suspect na si Dr. Zosimo Damaso, tubong Pangasinan at residente ng J. Luna St., Susana Heights, Executive Village ng nasabing lungsod.

Sinabi ni Lomibao na si Damaso ay nasakote bandang alas-9:25 ng umaga sa loob ng klinika nito habang aktong ilalaglag ang sanggol ng isang nagngangalang Sharon Balingit.

Lingid sa kaalaman ng manggagamot ay nakaposte na ang mga operatiba ng PNP-CIDG matapos na makatanggap ng impormasyon hinggil sa katiwalian nito.

Nabatid pa na sumisingil ng malaking halaga mula P20,000 pataas ang suspect depende sa bilang ng buwan ng isang sanggol na ipinagbubuntis ng kanyang mga pasyente na nais magpalaglag.

Pinainom umano ng doktor ng apat na Mifiprestone anti-biotic ang kaniyang pasyente, tinurukan ito ng Ceftriaxone sodium at kasalukuyang ipinapasok na ang speculum sa maselang bahagi nito nang dakpin ng mga awtoridad.

Sa isinagawang pagsusuri ng PNP Crime Laboratory experts, nabatid na ang itinurok na gamot kay Balingit ay isang uri ng expired na anti-biotic na may halong diluted water na malakas makapagpalaglag ng fetus.

Nakatakda nang sampahan ng kasong medical malpractice ang nasabing manggagamot na namemeligro ring makansela ang lisensiya. (Ulat ni Joy Cantos)