Memes

Nalingaw ko nga nagbasa sa mga memes maylabot sa super typhoon Mawar. Nunot sa forecast nga labihan ka kusog sa naasoy’ng bagyo, gikugangkugangan ang publiko labi pa nga lab-as pa ang atong kasinatian sa bagyong Odette.

Ang mga opisyal sa lokal nga mga kagamhanan nag-iyahay sa pagpangandam. Ang uban sayo kaayo nga mipahibawo sa pagsuspenso sa mga klase bisan wala pa mosulod sa Philippine Area of Responsibility ang bagyo.

Way kumpiyansa bisan kun sigun sa PAGASA way direktang epekto ang bagyo dinhi sa Sugbo.

Apan dili ang pagpangandam sa nagkadaiyang mga LGUs ang nakapaalegre. Bisan way bagyong niabot way nausik sa gihimong pagpangandam tungod kay bisan kanus-a way overkill sa pagpangandam.

Ang makalingaw mao ang mga memes. Pipila sa mga memes gipaagi og pag-ampo nga nagkanayon: “Ginoo ilikay intawn mi sa bagyo dili ra ba mi amigo sa tiglista sa ayuda”.

Diha say usa nga nagkanayon: “ Nilikay si Mawar kay gubot kaayo ang Pilipinas kun maghinatagay na sa hinabang.”

Makalingaw apan sa samang higayon makauuwaw labi na gyud sa mga hingtungdan.

Subo nga ang mga katalagman gihimong oportunidad sa uban pagpamintaha sa ilang isigkatawo.

Pananglitan ang pagpanglista sa mga biktima nga angayang makadawat og hinabang gihimong pamolitika. Ang mga kaalyado ra sa politika sa mga gitahasan pagpanglista maoy ilakip bisan ang uban  di gyud gani tinuod nga biktima.

Sumala pila pa kabuok tinuod nga biktima sa Odette niadtong 2021 ang wa gyud kadawat og hinabang hangtud ron?

Napul-an nalang ang uban og pinangita hain ang gisaad nga P5 mil sa tanang biktima. Ang uban nangamatay nalang og pinaabot!

Kun kanus-a mausab ang way klaro nga paagi ug gubot nga sistema sa paghatag sa ayuda sa mga biktima sa katalagman wa pay nasayod.