Pangutan-a, hinayhinaya

Dear Tito Miguel,

Nakabasa ko sa imong mga tambag sa akong friends ug na-amaze ko og maayo. Ako diay si Zisa , taga Labangon, ug akong problema ron kay  ang akong uyab kay dili kaayo hinagad sa akong friends ug mao na ang permi namo awayan. Ako na siya nga gitambagan nga usbon ang iyang batasan pero hangtud karon, wala gyud siya nag-usab. Please tambagi ko kun unsa ang akong buhaton. Salamat kaayo. —  Zisa

Zisa,

Pangutana niya ngano, kinahanglan gikan niya ang tubag. Kun dili magklaro, daghay posibilidad. Lagmit maulawon lang siya. Hasta sa imong pamilya? Kay kun sa imong pamilya hinagad siya, tingali para niya mas importante sila. O basin anti-social, dili ganaha’g laing tawo apil imong mga amigo.

O dili ba kaha nahadlok unsay ilang ikasulti. Basin bugal-bugalon imong mga amiga nga mahawngan siya. Kun dili hinawayon imong barkada, ipasalig niya. Kun hinawayon, hangyoa sila nga hinay-hinayon imong uyab kay sensitibo raba.

Puro lang ba babaye imong tropa? Kay kun duna sab mga lalaki basin mas kumportable siya. Apan bisan pa, man lalaki o babaye o sagol, sa hinay-hinay siya kanila ipaduol. Ayaw lang pugsa, hatagi’g higayon nga siya makaamgo nga but-an ug lingaw sab diay imog mga higala. Pagsugod sa usa lang ka higala nga tan-aw nimo dili makapagulat niya. Ayaw ang tibuok grupo kay samot siya mopalayo.

Apan kun di siya hinagad kay gusto niya kamo ra pirmi duha, kabahan ka na. Kun ang yano nga pagtimbaya dili niya mabuhat, nagbaga kini nga red flag. Possessive, ikaw ra iyang kalibotan, hasta mga higala selosan. Sa primero kiligon pa ka, laliman ka iyang kinabuhi nagtuyok ra nimo. Kun ganahan ka sa pagbati nga ikaw gipanag-iya, sakar mong duha.

Unya nireklamo man ka nga di siya managad sa imong mga higala, buot pasabot dili ra siya imong kinabuhi. Tingali karon maagwanta pa, kadugayan mapul-an ug matuok ka. Toxic. Desisyon na samtang sayo pa. —Tito Miguel

Magpatambag ka? Ipada kang Tito Miguel: 0998-581-5856