Nasunog sa impyerno

Dear Tito Miguel,

Ka kuyaw pud atong asawa nga nasakpan sa bana sa usa ka motel uy, unya nikatkat sa kisame! Maka relate ko maong nakuyawan ko. Dili seaman akong bana, army but wala diri sa Cebu na-assign. Wala pami mga anak. Akong uyab  rider. Nadaot sa order2 online, na fall ko niya kay guwapo man siya. Minyo pud siya.

Pero na guilty na ko, Tito Miguel. But nadutlan man ko aning rider uy. Pero nahadlok ko masakpan mi sa akong bana kay wala ra bay asong makumkom. Naglibog ko actually. Palihog tambagi ko. —Miss Sinful

Ms. Sinful,

Kahibawo na ka dakong kalapasan sa balaod ug sa imong bana imong binuhatan. Ang angay na lang nimo maamgohan kinsa imong gipasakitan ug unsay imong dangatan.

Dili lang imong bana ang nailad, hasta asawa sa imong driver sa kama. Dili lang sila inyong pasakitan, apil ilang mga anak nga maoy hingpit maapektohan sa inyong binuhatan.

Kun masakpan mo, dakong iskandalo. Inyong pamilya tibuok kinabuhi magpas-an sa imong kagahapon. Inig kaylap sa social media, di na malimod kay mapatik na sa hangtod. 

Maayo’g iskandalo ra, nalimot ka imong bana sundalo. Unyag moabot sa tigbas, pusil ug patay. Basin wa pa ka kahibawo, dili mapreso imong bana kun mopatay ninyong duha sa akto nga nagsirko -sirko. Pangutana’g abugado basin nasayop ko. Kamo masakpan ra, ang pangutana kanus-a.

Pero karon lagmit sa rason di ka maminaw, kay naglabaw imong lingaw. Insakto pa ka’g kabuot pero wa na kay buot. Wa ka maglibog, gilibogan ka kun tagalog pa. Kahibawo ka nga sayop, apan madala ra ka’g usa ka tayhop. Ang duwa sa kalayo, duol sa impyerno. Dili kay mamatay na ka, apan masunog samtang buhi pa.  —Tito Miguel