Tito Miguel

Dear Tito Miguel,

Ako diay si Valeria, taga Labangon, Cebu City ug nag-work isip usa ka call center agent. I don’t know kun unsa na ang nahitabo nako, dili man gyud nako ma-kontrol akong bisyo sa tagay. Sa usa ka semana, mura’g ka tulo ngadto sa ka upat gyud mi magtagay sa akong workmates.

Inig-out namo sa work, mohapit gyud mi og imnanan diha sa Salinas. Naa tay time nga ganahan ko mobiya sa maong bisyo, pero ambot lang uy, magpangita man gyud ko og tagay. Wala gyu’y lami ang beer, pero magpangita man gyud ko.

Makaingon ko nga kompleto na akong adlaw kun makatagay ko. Magpatambag ko nimo Tito Miguel, basin naa kay tinagoan nga tips diha aron makahinay-hinay ko og biya sa pagsige og tagay.

Daghang salamat sa paghatag nimo og pagtagad sa akong mensahe. Valeria

Valeria,

Kun birahon na ka sa imong lawas ngadto sa inom, tingali ang pagka-alchoholic imo nang naangkon. Kun ang tagay compulsive, dangop og professional help. Susiha imong kaugalingon ngano di ka makabalibad sa tagay aron makabiya ka sa hinay-hinay.

Dakong posibilidad nga imong pagtagay human sa trabaho usa lamang ka pamaagi nga imong gibawi ang kakapoy sa lawas ug hunahuna. Kay naa man ka sa call center nga kasagaran graveyard shift, kuwangan lang ka sa tulog, dili sa ilimnong makahubog. Wala ka giuhaw, kinahanglan lang ka matagpilaw. Katre ang tinuod nimo nga laraw dili ang botelya nga bugnaw  kay ang kakapoy nasaypan lang nimo nga kauhaw.

Basin sad wala kay igong rason nga mopauli dayon. Unsa may kahimtang sa imong giulian, basin ang pagpanindot niini kinahanglan. Haruhay ba imong kuwarto ug humok ba imong katre nga sa pagkatulog kanimo makapadani? Usahay di ta ganahan mouli dayon kay sa balay walay nindot ulian nga rason. Sa imong pag-antos sa trabaho, hatagi og ganti imong nagsakit nga hawak sama sa humok nga kama ug kumportable nga lawak.

Ganahan lang ka’g get together, kay wa man diay lami nimo ang beer. Balibad tiguma ang kuwarta nga unta nagasto nimo kuyog nila. Sa kadako sa imong natigom inig abot sa usa ka panuigon, basin di na ka molingi nila huma’g buak sa alkansiya.

Kun di ka kabalibad, isugyot nga magtinabangay mo paglimita sa inyong kalingawan ka usa kada semana, aron samtang nagtrabaho unom ka adlaw duna moy hinamhinamon nga makapatagbaw. Kun ang tapok halos adlaw adlaw, mawagtangan mo’g hisgotanan nga makalingaw. Kun panagsa ra, mas init inyong panaghinangop ug sa gastos dako’g madaginot.

Ang bisyo sa mga batan-on lisud pakgangon, apan ang lawas maningil inig labay sa panahon. Kun di ka gusto mahiagum, do it in moderation.

Tito Miguel