Mitoo ako

ADLAW SA MGA MINATAY. Ngitngit na ang menteryo apan nag-inom gihapo’g tuba ang magbarkadang Tolyo, Bentong ug Inting atubangan sa nitso ni Gudik, suod, nilang higala nga dugay nang namatay kay nasobraa’g inom og viagra. Gituyo nila ang dili magsuga aron dili kaayo maklaro ang ilang gihimo sa mga nanuaw sa lubong sa tagsatagsa nila ka minahal. Aduna ra bay mga pulis nga nagrobing ug naniid. Sa bagay, silang tulo polis. Pero pulos on leave. Mao nga nakahigayo’g duaw sa lubong ni anhing Gudik, kinsa giagda nilag tungga.

“Bay Gudik, gawas usa diha sa imong gihigdaan, uy! Dali, mag-inom ta!” Ang magkabarkada pagdapit sa ilang kanhi dakodako.

“Ganina ra kong nakig-uban ninyo, Bay. Wa lang mo kamatikod kay di na man ko makita.” Kalmang tingog nga daw naglutaw sa hangin. Ang siga sa kandila nga mao ray gihimo nilang dan-ag napalid sa bugnaw’ng huros nga misapigad sab sa ilang lawas.

Nagkatinutokay ang tulo sa ilang nadungog.

“Ayaw kahadlok, Bay. Kay di ko kamo unsaon.” Padayon sa mahigalaong tingog. “May ihangyo lang unta ko.”

“Unsa man kana?” Ni Tolyo pa nga mihana’g tungab sa tuba.

“Sa sunod ba, ayaw intawon himoang hungot kanang akong bagulbagol!”

“Haaa??? Di diay hungot ning among giipisan? Imoha diay ning kalabera, Bay?”

“Oo, Bay, akoa nang bagulbagol. Na’ay...pwerting sukoa sa akong amo nga nagsige’g tan-aw ninyo. Magpadala kuno siya’g tulo ka itom nga anghel nga mokuha ninyo aron itambog mo diri sa impiyerno.” Seryosong pahibalo sa tingog.

“Mao ba?” May kahingawa nga midumbol sa dughan. Nakuyawan ang magbarkada.

“Pero ayaw kabalaka, Bay. Pangadye la’g MITOO AKO. Kana gyong kinasingkasing ug kompleto ang mga pulong nga manggawas sa inyong baba. Buwahan, di makaduol ninyo ang mga itom nga anghel. Kay kon masipyat mo, aduna gyoy daotang mahitabo ninyo.”

Maoy nakanindot. Kay nilang tulo wala gyoy nakasag-ulo sa MITOO AKO. Unsaon na man lang niini karon? Sa itaas, nakita ra ba nila ang tulo ka nagdagtom itom mga anghel nga pulos nagdala’g sanggot sa kamatayon, kinsa mipaingon na sa ilang nahimutangan. (Kataposan)