Revolutionary gov’t kinontra

MANILA, Philippines - Kinontra ni National Security Adviser Hermogenes Esperon Jr. ang mungkahi ng ilang retired generals at netizens kay Pangulong Duterte na magtayo na lamang ng ‘revolutionary government’.

Sinabi ni Esperon sa media briefing sa Malacañang, hindi kailangan ang isang revolutionary government upang matugunan ni Pangulong Duterte ang mga pangunahing suliranin ng bansa.

“Siguro nababagalan sila sa pag-establish ng federal system but let it be. Mahihinog din iyan,” wika pa ni Esperon sa Malacanang reporters.

Nanindigan din ang national security adviser ni Duterte na hindi kailangan ang revolutionary government dahil mas tanggap ng mga Filipino ang demokrasya.

“Bakit ka maghahanap ng ibang set up? This is our way of life – democratic,” giit pa ni Esperon.

Ilang retired generals at netizens ang nanawagan kay Pangulong Duterte na itayo na lamang ang ‘revolutionary government’ para mas mabilis nitong matugunan ang mga problema ng bansa.