Nakig-date kang Ramon ang engkantada

Dunay gikahibudngan ang  inahan ug amahan ni Ramon bahin sa usa ka batang babaye nga makita nila diha sa tugkaran ilawom sa dakong punoan sa nangka.

Ug dihang giduol kini ni Asiang,  inahan ni Ramon, kalit lang kining nahanaw. Ug nanglibawot ang balhibo ni Asiang. Ug midali siya'g saka sa taas diin tua didto si Ramon, ang 12-anyos nilang anak nga natulog sa kuwarto. Gisultihan ni Asyang si Tikoy bahin sa iyang nakita apan ingon sa kuwang og pagtuo si Tikoy kinsa mipahiyom hinuon.

"Unsa to, batang babaye nga nagduwaduwa sa tugkaran unya kalit lang nawala ahh...hunahuna lang na nimo oi Asiang," ni Tikoy ngadto sa asawa dayong kanaog sa silong. "Inig mata ni Ramon paapasa lang unya siya diri sa baol."

Nanglabay ang daghang katuigan gikan niadto ug si Ramon usa ka hingkod nga ulitawo. Unya usa ka hapon nakabati si Asiang ug ingon man si Tikoy og tingog ni Ramon ug tingog usab sa usa ka babaye, maong midali sila'g dungaw sa bentana. Maoy ilang nakita si Ramon kuyog sa usa ka guwapa kaayong dalaga, puti, taluytoy ang ilong ug tag-as ang buhok nga pinadunghay.

"Maayong hapon nang Asiang, noy Tikoy," nangatahoran ang guwapang dalaga. "Gikan pa mi ni Ramon sa daplin sa suba nanuroy mi. Ako diay si Almira ug ang among balay naa ra diha sa tampi sa suba duol sa atabay nga karaan. Kanang dakong kahoy nga akasya mao nang among balay."

Nasabtan dayon ni Asiang ug Tikoy nga usa ka engkantada ang gikakuyog ni Ramon didto sa suba. Ug karon nia kini ug may relasyon na tingali ang duroha. "Sus kakuyaw sa kinabuhi ni Ramon,  ni Asiang nga gibati'g kabalaka. Apan tinuod gyud ang tanan kay si Ramon gidala man sa guwapa nga engkantada didto sa ilang balay ug wala na kini mahibalik. Gidala kini sa anak nga prinsesa sa hari sa mga engkanto. Nagdungan pagpanghilak sila si Asiang ug Tikoy sa ilang nahibaw-an gikan sa albularyo. Apan usa ka hapon mitumaw si Ramon kuyog sa iyang asawa nga engkantada ug gihatagan sila'g kuwintas nga bulawan. (Kataposan)