Kilomkilom sa sityo Bungolbungol (Kataposan gula sa ungo-ungo)
May gikahadlokan ang taga sityo Bungolbungol ug kini bahin sa usa ka tiguwang dato nga maoy nakapalit sa balay ni Mr. Akimuro, ang dato sab nga Hapon nga nakahunahuna'g balik sa Japan.
Dunay asawa si Mr. Akimuro, si Analinda nga anak sa gidungogdungog nga ungo didto sa pikas balangay. Ug kay wala na man si Mr. Akimuro, si Mr. Dapitan mao na ang tag-iya sa balay.
"Ako, Meling, nagduda anang tiguwanga. Ungo man tingali kana siya," nagkanayon si Anton, nga ang gipasabot mao si Mr. Dapitan.
Si Anton anak ni Ingko Kolasyo nga giilang banggiitang albularyo dinhi sa ilang dapit. Ug kay patay na man si Ingko Kolasyo, si Anton maoy nakapuli sa iyang abilidad. Ug karon nakahukom si Anton nga iyang pakigkitaan si Mr. Dapitan.
Sa didto na si Anton sa balay ni Mr. Dapitan, gipadayon siya sa tiguwang, gidalitan og mahalong bino. "Maayo kay imo kong gianhi dinhi ning napalit kong balay, Anton. Gusto ko sa mga silingan nga moila gyod og silingan. Sayod man ko ba nga inyo kong gidudahan nga ungo, di ba, Anton?" Miyango si Anton. "Mao nay ilang pagtuo dinhi, Mr. Dapitan...."
"Silverio, tawga lang ko'g Silverio, Anton. Aw, kun mao na, husto man pod sila. Apan wala koy gibalbal dinhi sa sityo Bungolbungol, Anton. Dili ko mangunay og silingan," hinay ang tingog sa tiguwang.
"Tinuod gyod diay nga ungo ka, Noy Silverio?" ni Anton nga may gikuha sa iyang bag. Usa ka garapa.
"Imo kong sumpaon anang imong garapa, Anton. Dili ka makabuntog nako, Anton. Maypa mag-uban na lang ta. Gusto ko nga patakdan tika, ug unya duna ka na unyay ikasakbang sa mga mangtas nga ungo moanhi dinhi sa sityo. Sila ang mobalbal og tawo, Anton," ug gihapuhap ni Mr. Dapitan o Ingko Silverio si Anton. Ug dihang miatake ang mga mangtas nga mga ungo nga gikan sa isla Itom-Bukog, sila si Anton ug Ingko Silverio ang miasdang ug nakigkombati sa mga mangtas nga ungo nga mobalbal og tawo. (Kataposan)
- Latest
