Guwapa nga manager

Sa unang higayon ingon sa gibakikawan kaayo si Lester nga misangpit lang sa ngalan ni Glenna nga iyang manager. Apan nasabot niya nga maoy gusto ni Glenna nga dili na siya tawgon pa og ma’am.

Dili sila kauban sa usa ka opisina apan ang iyang gitrabahoan ubos gihapon sa pagdumala ni Glenna. Kanunay si Lester nga mokonsulta ni Glenna kun aduna siya’y buot nga himuon nga kausaban sa iyang opisina aron pagpalambo sa ilang negosyo.

Usa ka hapon, mikontak kang Lester si Glenna ug nangutana kun wala ba siya’y lakaw inigkagabii. “Gusto ko unta nga iuban ka sa party nga akong tambongan unyang gabii,” matud ni Glenna. Wala g’yud magduha-duha si Lester pagtangdo sa pagdapit ni Glenna kaniya nga magkuyog sila sa party nga tambongan sa iyang manager inigka-gabii. “Salamat, ayaw lang dad-a ang imong service vehicle, agion lang tika diha after office hours,” ni Glenna.

Nalipay si Lester nga suod na kaayo niya ang ilang manager. Apan may mitumaw nga pangutana sa iyang huna-huna. Nakapangutana siya kun ngano’ng dili man ang bana ni Glenna ang iyang iuban sa party?

Tuod, mga 5:30 sa hapon, giagi ni Glenna si Lester sa opisina sa ulitawo. Wala na manaog si Glenna sa iyang sakyanan. Misakay si Lester sa sakyanan ni Glenna. Wala g’yud kapugong si Lester sa iyang kaugalingon, gipangutana g’yud niya si Glenna kun ngano nga dili man ang iyang bana ang iyang iuban.

“Three years na nga buwag kami ug sa akong bana Lester. Nahibaw-an nako nga may lain diay siya nga pamilya mao nga akong gibuwagan. Nagbahin mi og negosyo ug gihikay na ang annulment sa among kasal,” matud ni Glenna.

Mao diay nga nagpauban si Glenna kang Lester kay sa Danao City ang birthday party sa iyang amiga nga ilang tambongan. (Sumpayan)