Love ko si Doktora - Gula 6

Milampos g’yud si Marco pag-angkon sa gugma sa batan-ong doktora. Wala g’yud magpadugay-dugay si Dra. Marlyn pagsugot kaniya. “Ang tinuod Marc, nakagusto ‘sab ko nimo tungod sa imong kabuotan,” ni Marlyn.

Gisaad ni Marco sa doktora nga siya ang babaye nga iyang pakaslan ug dad-on sa altar sa simbahan. Tam-is kaayo ang pagsinaaray nila’ng duha. Wala damha ni Marco nga atol sa iyang birthday maangkon niya ang tumang kalipay. Wala gayud ililong ni Marco sa iyang mga ginikanan ang ilang relasyon ni Dra. Marlyn. “Love ko si doktora daddy ug wala ko magdahom nga nakagusto ‘sab diay siya nako,” gitug-anan ni Marco ang iyang amahan.

Igo lang mipahiyom si daddy niya Roman ug mipasalig nga suportahan niya kun unsay ilang hukom. Milabay ang mga adlaw, semana ug mga buwan. Nahingpit na gayud nga usa ka engineer si Marco. Mipasar siya sa pasulit nga gihatag sa Professional Regulations Commission.

Gitawgan dayon ni Marco si Dra. Marlyn ug gipahibalo sa iyang kalampusan. Malipayon usab kaayo ang girlfriend niya nga doktora sa kalampusan nga nakab-ot ni Marco.

“Unya, dili lang ba nato iselebrar ang imong accomplishment?” matud ni doktora Marlyn. Nagkasabot sila nga magkita inig-off sa doktora sa iyang duty sa ospital nga gialagaran.

Pagka gabii na, nagkita sila si Marco ug Marlyn. Si Marlyn mismo maoy miadto sa pinuy-anan sa iyang boyfriend. “Asa ta manuroy karon?” gisukna ni Marlyn si Marco. “Bisan asa, ug mas maayo unta nga kanang dapit nga kita ra’ng duha, total engineer na kining imong boyfriend, makabuhi na ko nimo,” matud ni Marco.

Nakasabot si Dra. Marlyn kun unsay ipasabot sa iyang boyfriend. Nagtinutokay sila’ng duha ug giukoban ni Marco ang mga ngabil sa iyang girlfriend. Dihang milunga na ang ilang paghagkanay.

“Ikaw drive sa kotse Marc, ug ikaw na’y bahala asa ta mangadto kay total Domingo bitaw ugma. Isalig nako ang akong kaugmaon sa boyfriend nako nga engineer na,” ni Dra. Marlyn.

Si Marco na ang mi-drive sa kotse sa doktora ug mipasirit dayon siya paingon sa dapit nga gusto niya’ng adtoan. (Kataposan)