Salamat sa kawatan - Gula 3

Wala madugay nakadawat og reply si Lando gikan ni Femarie human niya gitug-anan ang dalaga nga nagpakisayod ang polis sa iyang contact numbers.

“Sige bitaw to siya og tutok nako ganina pag-imbistigar niya sa kawatan. Dili ko ganahan niya uy kay klaro man to siya nga minyo na,” matud ni Femarie.

“Mao lagi. Wala nako hatagi sa imong contact numbers kay makaribal unya nako siya,” gisubli ni Lando ang iyang pasumbingay sa dalaga.

Abtik kaayo nga naka-reply si Femarie apan igo lang kini nga nagkatawa. “he he he :)” Nagpasabot nga nahimuot siya sa mensahe ni Lando.

Gisukna ni Lando si Femarie kun asa kini magtrabaho. Wala motubag ang dalaga. Milabay ang mga adlaw nga wala sila’y kumunikasyon si Lando ug Femarie.

Adlaw’ng Martes, day-off ni Lando ug nakahuna-huna siya nga mosuroy sa dakung mall sa uptown. Wala pa makaanha sa mao nga mall si Lando mao nga naikag siya nga motan-aw sa ilang baligya.

Nadani si Lando paghiling sa mga display sa nindot kaayo nga T-shirts. Imported nga T-shirts apan barato ra ang kantidad.

“Hala! Ikaw lagi kini Lan!” tingog sa babaye ang nadungog ni Lando gikan sa iyang luyo nga maoy nakapaigking kaniya.

Sa paglingi ni Lando nabantang dayon sa iyang panan-aw ang mapahiyumong panagway ni Femarie. “Dia ka diay dinhi magtrabaho Fem?” matud ni Lando nga wala usab makapugong sa pagbuhi og tam-is nga pahiyom.

“Yes, ang akong uncle ang tag-iya aning botique mao nga gibutang ko niya dinhi isip cashier,” mubo nga tubag ni Femarie.

Nangayo’g pasaylo si Femarie nga wala na siya makakontak kang Lando tungod kay bisi kaayo sila sa pag-imbintaryo sa ilang mga baligya.

       Gipasabot ni Femarie si Lando nga mata’g Enero maghimo gayud sila og imbintaryo sa mga baligya mao nga wala na siya makahigayon sa pag-text bisan sa pagpangumosta na lang ni Lando.

“Ikaw Lan, nganong wala ka man ‘sab maka-text nako?” gisukna ni Femarie ang ulitawo. “Kuan, maikog ko nimo kay basin og samokan ka unya mao nga giluom ko lang ang akong mga kamingaw nimo Fem,” ni Lando pa.

Misamot nga nakapahiyom si Femarie nga nakadungog na gayud gikan mismo ni Lando nga daw nagpalabtik nga may kaibog kini kaniya.

“Bitaw, mingawon man g’yud basta suod nimo nga amigo o amiga,” matud ni Femarie.

Gitutokan ni Lando si Femarie ug daw anam-anam nga nagtubod ang iyang laway sa kaibog nga nagsud-ong sa matahom niya nga panagway. - Sumpayan