Goodbye is not Forever - Gula 30

Gipugos ni Albert ang pagpakita ngadto sa hinigugma nga malipayon usab siya bisan og nagdugo ang iyang kahiladman.

Direct  to Canada ang sakyan ni Josheba nga eroplano. Malipayon ang tanang miyembro sa iyang paglarga.

“Pag-ayoayo,” mikagalkal ang tingog ni Albert. Nabatyagan niya nga mihuot ang iyang dughan. Sa iyang dagway milabhag ang tuman nga kasubo.

“Salamat,” ni Abigail pa. Nagpakaaron-ingnon siya nga malipayon bisan ang tinuod gisanapan usab sa kasubo ang iyang dughan samtang  naghunahuna sa una nilang panaglagyo ni Albert.

“Magsige lang unya ta og chat, ha,” matud ni Josheba. “Basta wala koy duty mag-online gyud ko permi. Ug dili na malisod kanato kay puwede na man ta mag Skype di ba?

Wala mosumpay sa pagpamulong si Albert sa gipanulti ni Josheba.

Human sa panamilitay, si Josheba misaka na sa ayroplano. Si Albert misunod pagtan-aw sa dalaga nianang tinan-awan nga nagpasupot og kawili. Mora’g gihiwa ang iyang kasingkasing samtang nagtan-aw sa hinigugma nga sa dili madugay mahilayo na kaniya.

Sa pultahan sa eroplano mibarog si Josheba. Miwara-wara kini sa mga kamot ngadto nilang Albert. Mibalos sila pagkaway ngadto sa dalaga. Unya milahos na si Josheba pagsulod sa ayroplano. -- Sumpayan pa