Ang sekreto sa kampeyon

Daw natay-og ang Araneta Coliseum sa makabungog nga hugyaw sa mga tawo dihang napakamang sa defending champion nga si Raffy Bamboa, sulod sa 12th round ang kaatbang niini sa boksing nga si Bobby “The Bulldozer” Kerozov, usa ka Russian boxer. Mao kini ang ika-limang higayon nga malampusong napanalipdan ni Raffy ang iyang korona isip kampeyon sa welterweight division.

Napuno sa pagdayeg si Raffy Bamboa, nga gitawag og Pambansang Suntok sa Pilipinas tungod sa talagsaong katakos niini sa natad sa pamoksing. Gumikan niini daghan politiko ang nag-ibid-ibid niini nga paapilon sa ilang partido ug padaganon pagkamayor sa ilang lungsod sa Buenavista nga sumala sa mga taho mao kunoy iyang gigikanan. Gawas niini daghan usab nga mga anak si Eba nga nagsige og sunodsunod sa kampeyon, naay gikan sa mga hamiling banay sa katilingban ug ang uban gikan sa showbiz sama ni Ara Ranillo.

Gikan sa mga coffee shop sa mga five star hotel lakip na ngadto sa mga tubaan sa daplin daplin, walay laing sumsuman sa estorya niadtong mga adlawa kun dili ang dugang nga kadaugan ni Raffy Bamboa. Pero daghan ang nahibulong nganong sa tanang away ni Raffy kadto ra ang niabot og 12 rounds.

Kilid sa usa ka lagkaw sa kabaybayonan sa barangay Tulay, sadya kaayo nga nagtagaytay og tuba ang mga managhigala nga sila si Joel, Sidro ug Marko aron pagselebrar sa kadaugan sa ilang idolo.

“Naglibog ko parts diin gikan ang talagsaong kusog ug katakos ni Raffy,” matud sa pula na og hasang nga si Joel.

“Sumala sa mga estorya-estorya nakakita kuno kini si Raffy og martelyo nga naglutaw dihang namasol kini kaniadto sa dagat nga maoy iyang gihimong anting-anting. Ang uban usab nag-ingon nga nakahigala kuno kini og agta nga maoy nihatag og gahum niini,” nagkanayon si Sidro samtang nagpang-os sa tinunuang kagang nga kuha sa ilang lit-ag.

“Nahibulong lang ko mga pare koy mora og menos na og power ang left hook ni Raffy. Nagsugod na ba pagbahar ang abilidad sa atong idolo?” pangutana ni Marko dayong yarok sa usa ka hungot nga tuba.

Samtang niadtong tungora sa usa ka hilit nga dapit sa Manila. Sulod sa usa ka high tech nga laboratory. Mabalak-on si Propesor Zirilok, ang trainer, manager ug mentor ni Raffy nga nagsud-ong sa kampeyon nga niadtong tungora iyang giplastar sa usa ka operating table. Ubos kini sa general anesthesia.

Mainampingon ang upaw nga propesor nga mi-examine sa kampeyon ilabi na sa walang bukton niini. Mora og menos na og power ang left hook sa kampeyon kay sa tanang kontra niini sulod sa ring, si Bobby Kerozov ra maoy nakalahutay hangtud sa 12 round. Ang uban gani maglisud pag-abot bisan og 6 rounds.

Pinaagi sa modernong apparatus sa propesor, iyang gitangtang ang wala nga bukton ni Raffy. Usa diay ka cyborg (half man, half machine) ang kampeyon. Dili lang diay trainer ug manager ang propesor ngadto ni Raffy kun dili siya usab ang inventor sa naulahi.

Iyang giisip si Raffy nga usa niya ka obra maestra. Nakapahiyom si Propesor Zirilok dihang iyang nahibaw-an ang hinungdan nganong nimenos ang power sa walang bukton ni Raffy.

“He! He! He! Duna diay gamay nga tornelyo sa bukton nga naluag ug angay na nga ilisdan.”

Gilingi sa propesor ang iyang ulipon nga si Hugo nga niadtong tungora didto sa suok. Nagtabisay ang laway niini nga nagtan-aw og usa ka porno nga salida.

“Hugo! Adto sa hardware ni Siong Ho ug pagpalit og tornilyo unya apili usab og lastiko. He! He! He!” (Katapusan)