Ang kaisog

Gula 2

Talitapos na si Rodel sa iyang kurso nga Criminology ug usa siya sa mga police interns nga miabag sa kapolisan   dinhi sa dakbayan. Gianggaan gani siya sa iyang maestro og “tunay na polis” kay lahi siya sa ubang mga police interns.

Kun ang ubang mga police interns igo lang magbarug daplin sa karsada nga panagsa ra kaayo moatiman sa problema sa trapiko, si Rodel labaw pa gani sa tinuod nga polis kay seryoso kaayo siya sa iyang trabaho.

Damgo gayud ni Rodel gikan pa sa iyang pagkabata nga mahimo siya nga tinugyanan sa balaud. Karon nga hapit na niya mahuman ang iyang kurso, duol na usab ang katumanan sa iyang pangandoy.

Walay nahimo ang dinakpan nga mangunguot gawas sa pag-angkon sa salaud kay nakuha man gayud sa iyang bulsa ang pitaka ni Glenda. Gitug-an usab niya ang ngalan sa iyang kauban.

Nadakpan dayon sa kapolisan ang kaubang mangunguot ug dungan sila nga gipasakaan og kaso sa piskaliya. Si Rodel maoy nagsilbi nga saksi batok sa mga mangunguot.

Kini maoy rason nga nagkasuod sila’g maayo ug si Glenda. Dunay mga higayon nga gikan sa husay sa kaso nga ilang tambongan, magdungan sila pagpangaon.

Wala magdugay ang paghusay sa kaso, gihukmang sad-an sa hukmanan ang duha ka mangunguot.

“Congratulations Rodel, midaug ta. Maayo kaayo nimo nga pagpasabot sa huwes kun giunsa sa mga mangunguot sa pagbiktima nako,” giingnan ni Glenda si Rodel human gayud mabasa ang disisyon sa huwes.

Miabot ang graduation day. Dungan sila si Rodel ug Glenda nga mitapos sa tagsa-tagsa nila ka kurso. Nahuman usab ni Glenda ang iyang kurso nga Bachelor of Science in Commerce (BSC) Major in Accounting.

Human sa graduation, tagsa-tagsa sila si Glenda ug Rodel nga namauli sa ilang dapit sa probinsya. Naputol ang ilang kontak kay wala kaayo’y signal sa selpon didto sa ilang dapit ni Rodel.

Milabay ang pipila ka buwan, nakadungog si Rodel sa DYLA nga nanginahanglan og aplikante para kadete ang Philippine National Police Academy (PNPA).

Nadawat si Rodel. Didto siya nag-training sa Camp Vicente Lim sa kaulohan. Dali ra kaayo nga milabay ang mga adlaw, semana, buwan ug mga tuig. Nahuman ni Rodel ang training ug karon hingpit na siya nga opisyal sa kapolisan.

Gidistino si Rodel sa usa sa mga police units sa Cebu City Police Office. (Sumpayan)