Ang gihimo ni Angeline ingon sa naghatag og dugang kusog ug kadasig ni Robert. Dihang gipadayon na ang dula, mitira dayon si Robert og 3 points. Mitrabaho pud siya og maayo sa opensa ug depensa aron kapugngan ang team nila ni Erik pagsungkit sa kadaugan.
Tuod man, gihinay-hinayan gayod og kitkit ang labaw sa team nila ni Erik. Dihang dos minutos na lang ang nahibilin sa dula milabaw na ang team ni Robert batok sa team ni Erik. 97-96. Ug sa pagkapupos gayod sa nahibilin nga mga gutlo sa dula, ang team gayod nila ni Robert ang migawas nga mananaog, 109-102.
Ang team gyud nila ni Robert ang nakasulod sa finals. Sayon rang gilampornas sa ilang team ang team nga ilang gikasangka sa kampiyonato. Gisaksihan gihapon ni Angeline ang paglangkat nila ni Robert sa titulo sa kampiyonato sa basketbol.
“Salamat sa imong moral support,” nagkanayon si Robert dihang nakahigayon siya sa pagpakigsulti kang Angeline.
“Way sapayan,” mubong tubag ni Angeline.
Hingpit nga natapos ang sportsfest. Mibalik na ang regular nga klase sa unibersidad. -- Sumpayan pa