Importante na

Dear Tita Salie,

Have a nice day and I hope that you are in good health, Tita. Just call me Shane, ug karon nia ko sa Minglanilla, Cebu. Bag-ohay lang ko diri mga usa pa lang gyud ka bulan kay diri man ko nakakita og trabaho.

Diri sa akong gitrabahoan naa ko’y nakaila nga lalaki. Hangtod nga nagkasuod ming duha. Apan dihang bag-o pa lang mi nga nagkaila, ako gyud siyang malditahan o dili gyud maayo nga batasan ang akong gipakita niya kay sungogan kaayo siya unya maglagot ko kay magsige man siya og paduol nako unya duna na ra ba siya’y ka-live in, dili ko gusto nga maawayan og tawo.

Permi lang gyud ko niyang sungogon kun mo-duty ko, unya iya kong ihatod sa akong boarding house inig out na nako. Magsige man siya ug hangyo nako nga mohatod siya, so, mosugot na lang pud ko, Tita. Hangtod sa kadugayan magsige na mi og kuyog manuroy. Mag-estorya mi about ourselves ug open na mi sa usa’g-usa. Amo usab nga estoryahan ang kabahin sa iyang live-in. Bisan unsa na lang, Tita, wala na mi gitago sa usa’g-usa.

Sa kadugayan lahi na ang akong na-feel kaniya, mora og importante na siya alang nako kay mora man og kulangan na ang akong adlaw kun dili ko siya makit-an. Ug wala nako damha ug nakugang ko dihang miingon siya’g “I love you” ngari nako. Duna na gyud koy feeling nya apan wala lang ko pahalata kaniya. Happy daw siya if we are together ug importante kaayo ko niya. Unsa may akong buhaton, Tita? Palihog pasabta ko. Thank you very much and more power.

* * *

Dear Shane,

Ingon gyud niana ang kasagaran nga mahitabo kun kanunay natong kauban ang usa ka tawo. Adunay attachment nga mag-anam og kahugot ug kalawom kun madugay na ang inyong panagka-uban. Sama sa usa ka similya o liso nga imong gitisok sa yuta ug kanunay bisbisan sa tubig inanay nga motubo ang liso ug mogamot hangtod nga kini modako ug gahi na kining ibton.

Misugod na og kamang ug panggunit ang gamot sa inyong panaghigalaay hinungdan nga mura og lahi na ang imong na-feel ngadto kaniya. Mao nga alang kaninyo lisud na nga ibton ang natisok nga liso sa inyong pagkahigala, nisugod na kini pag-develop. Apan sa dili pa nimo dawaton ang iyang gugma imo unang hunahunaon ug tan-awa kun sinsero ba siya, kay tingali unya kun nagpaklaro ka nga dunay pagbati ngadto kaniya ug gisakyan ka lang niya. Posible gyud kini nga nisakay lamang siya sa imong gipakita nga maayong pagtagad. Tingali unya kun may mga anak na ang maong lalaki daghan ka nag tawo nga mapasakitan kun imo siyang tubayan. Basin unya kun sa kaulahian igo ra ka niyang biyaan. Anaa kanimo ang desisyon, busa, hunahunaa pag-ayo kay ang lalaki dunay kabilinggan. -- Tita Salie