Gula 34
“Di ko gusto nga may komunikasyon kami kay makasamok kini sa akong pagtuon.”
Pagkagabii, didto sa boarding house si Angeline, samtang naghigda siya sa iyang deck human sa panihapon, may nanuktok sa pultahan sa iyang lawak.
Mibangon siya ug giablihan ang pultahan aron pagsusi kun kinsa ang didto sa gawas. Si Vera ang iyang nakita nga nagbarog gawas sa pultahan.
“May bisita ka,” taho ni Vera ngadto kaniya.
“K-kinsa?” Nakapangutana si Angeline niya kay wala man siya’y gipaabot nga bisita.
“Si Robert,” mubong tubag ni Vera.
Dugaydugay nang nangulitawo si Robert kang Angeline. Klasmet sab niya kini sa kolehiyo. Bohimyo ug bolero. Nagsalig tingali kay guwapo. Pero wala hatagi’g gibug-aton ni Angeline ang pagpangulitawo ni Robert kaniya. Nasayod siyang dili kini maayo’g reputasyon sa ilang tulonghaan.
Palikero si Robert. Bisan kinsa lang nga babaye ang gikarelasyon niini. Tungod lagi kay guwapo, kadali ra kining makakubit og babaye. Pero na-turn off si Angeline kang Robert. May looks tuod kini, pero wala man pud kini brains. Wala sab siya’y pagsalig niini. -- Sumpayan pa