Gula 100
“Jeffrey,” tingog ni Col. Noot. “Gawas na kamo diha.”
Hinay nga migawas si Jeffrey sa langob uban kang Danica. Gitahan ni Jeffrey ang kaugalingon niini ngadto kang Col. Noot.
Pagkasayod ni Mr. Ludo Mercado sa nahitabo sa iyang anak, nanawag dayon siya kang Cong. Rustico Ebero. Suod sa kongresista ang huwes nga maoy migunit sa kaso ni Jeffrey. Gusto ni Mr. Mercado nga iduot si Jeffrey aron mabilanggo kini gumikan sa pagpatay niini kang Brandon.
“Gikasubo ko, Kompadre,” balibad sa kongresista. “Pero wala na koy ikatabang nimo niining higayona.”
“U-unsay buot mong ipasabot, Kompadre?” Sukit ni Mr. Mercado.
“Bug-at ang mga ebidensiya nga nabatonan sa kapolisan batok sa imong anak,” ni Cong. Ebero pa. “Lakip si Col. Noot mo-testify nga ang imong anak gayod maoy matuod nga naglugos ug nagpatay kang Gemma Roca. Gawas pa, midistansiya na kanako ang huwes nga naggunit sa kaso ni Jeffrey Acero human pahamtangi sa DILG ug Court of Appeals og 6-months nga preventive suspension.”
Wala makatingog si Mr. Mercado.
“Suspendido ako karon, kompadre,” sa kongresista pa, gumikan sa pagkalambigit nako sa kasong abuse of authority, misconduct ug paglapas sa RA 6713.” -- Sumpayan pa