Mga tipaka sa kaalam

Ang Diyos adunay Ten Commandments o Napulo ka mga sugo. Ang military adunay ten general orders o napulo ka kasugoan. Samtang ang panaghigala (friendship) aduna usa'y napulo ka kasugoan ug mao kini ang mosunod:

1. Pakigsulti sa mga tawo -- walay laing maayo ug malipayong pulong sa pag-abiabi.

2. Pahiyom sa mga tawo -- nagkinahangla'g kapitoan ug duha (72) ka mga braso (muscles) pagmug-ot (frown) apan upat (4) lang ang pagpahiyom!

3. Tawga ang mga tawo sa ilang ngalan -- ang labing matahom nga huni sa pagdungog mao ang tunog sa ilang kaugalingong ngalan.

4. Pagka mahigalaon ug matabangon -- kun gusto kang adunay mga higala, pagka mahigalaon.

5. Pagka sinsero o maayo -- pagsulti ug paglihok nga ang tanan pulos gayud makalipay ug makapahimuot.

6. Pagka matinud-anon nga interesado sa mga tawo -- makagusto ka sa tanan kun mosulay ka lang.

7. Pagka manggihatagon sa pagdayeg, mabinantayon sa pagsaway.

8. Konsideraha ang mga pagbati sa uban-- kini dawaton ug pasalamatan sa hingpit.

9. Sabta ang mga opinyon sa uban.

10. Magmaabtik paghatag og serbisyo -- ang mas importante sa kinabuhi mao ang atong ikadalit o ikahatag sa uban.

Si Francis Bacon miingon: "Friendship doubles joys and halves grief." Sa ato pa, "Ang panaghigala modubli sa mga kalipay ug motunga o moiban sa kasub-anan."

Adunay panultihon nga gitamdan ug gisunod sa usa sa akong mga higala. Kini nagkanayon. "It pays to have friends; it never pays to have enemies." Tinuod gayud kini.

Ngano man? Tungod kay kun daghan kag mga higala, daghan ang motabang kanimo. Apan kun daghan kag mga kaaway o kontra, miserable ang imong kinabuhi kay daghan ang motabang pagduot kanimo!