Naghilak nga Bituon

Gula 74

“Dili ko ingon niana ka-conservative. Gawas pa, anad sab ko sa intriga. In fact, bentaha pa tingali ang showbiz kay sa politika. Sa showbiz kutob lang sa tsismis aron pag-promote sa career sa usa ka artista. Apan sa politika, maglinabayay gayod og lapok ang mga politiko. Kun union skin pa ko, dili ko makalahutay sa sistema sa politika sa atong nasod.”

Wala makatingog si Jackie. Maayo kaayong pagkahan-ay sa katarongan ni Cong. Dechavez nga gidiga kaniya. Apiki kaayong tubagon.

“Ang gusto kong masayran gikan kanimo mao kun gihigugma mo ba usab ako,” namulong ang kongresista taliwala sa iyang kahilom.

Hipokrito siya kun dili niya angkonon sa iyang kaugalingon nga may pagbati usab siya alang sa kongresista. Sukad sa unang higayon sa ilang panaghimamat, gaan kaayo ang iyang kabubut-on ngadto niini.

Sugton na unta niya si Julio. Apan may nakababag sa iyang pagdawat sa gugma niini. Nahinumdom siya sa loveteam nila ni Jerome.

Nahiunlod si Jackie sa lawom nga paghinuktok. Naglibog siya kun unsay angay niyang buhaton. Naglisod siya paghukom. Dawaton ba niya ang gugma ni Cong. Julio Dechavez o dili? -- Sumpayan pa