Saksi ang Busay

Gula 1

Mipalta si Paeng sa iyang trabaho karong hapona. Sukad pa kaganinang buntag nga wala siya mahimutang human masayod nga nakigtaban og laing lalaki ang iyang hinigugma nga si Joan.

Nag-inusara lang si Paeng nga mibisita pagbalik sa waterfall nga nahimutang sa barangay Matutinaw, nga sakop sa lungsod sa Badian, ang dapit nga didto siya gisugot ni Joan mga tulo ka tuig na ang milabay.

Alas tres sa hapon na nga miabot si Paeng didto sa falls. May kausaban na ang maong dapit human sa tulo ka tuig nga wala na siya makabisita didto. Gitultol ni Paeng kadtong nag-igdal nga bato nga nag-umbaw sa linaw, diin didto sila kaniadto manglingkod si Joan.

Gilab-as ni Paeng sa iyang panumdoman ang mga matam-is nga pahiyom ni Joan dihang gidawat na niini ang iyang gugma. Didto sila nagsinaaray nga kamatayon lang ang makabuwag sa ilang pagminahalay.

“Bakakon kang daku Joan!” daw nakasinggit si Paeng sa iyang kaisipan ug takulahaw lang nga nangambak ang mga lusok sa maasgad nga luha sa iyang aping samtang gipunting niya ang iyang panan-aw sa tubig sa linaw.

Daghang mga luha ang nangagas gikan sa mga mata ni Paeng nga daw gisanapan sa dili matukib nga kaguol niadtong higayuna. Sa unahan, dunay pundok sa mga lalaki ug babaye nga nag-piknik daplin sa linaw.

Gipunting ni Paeng ang iyang panan-aw sa maong mga tawo. Sadya kaayo sila, dunay nagsige og pangatawa. Sa hilom naibog si Paeng kanila kay nasabot niya nga pulos sila malipayon.

Dunay usa ka babaye nga gikan sa maong grupo nga miadto sa CR nga nahimutang sa unahan. Bisan og layo ra apan naklaro ni Paeng nga seksi ang maong babaye.

Susama gayud ni Joan ang panglawas sa maong babaye. Taud-taud nakita ni Paeng nga dihang migawas na ang babaye sa CR, wala kini mobalik sa grupo. Mitungas kini sa ibabaw nga bahin sa bukid nga gigikanan sa tubig.

Gikulbaan si Paeng. May misantop sa iyang kaisipan nga basin og moambak ang babaye ngadto sa tubig. Gisunod ni Paeng sa iyang panan-aw ang babaye. Wala siya masayop – miambak ang babaye gikan sa ibabaw ngadto sa tubig linaw.

“Bay! Bay! Ang inyong kauban miambak sa linaw!” nagkapagaw ang tingog ni Paeng nga mipahibalo sa mga kauban sa babaye. Midagan si Paeng ngadto sa linaw. (Sumpayan)