^

Si Hesukristo

Sugilanon - Julius B. Panerio / Colawin, Argao, Cebu () - April 18, 2011 - 12:00am

“Diyos ko! Nasayod akong dako kining sayop ang ako karong gilaraw.” Kibot-kibot pa sa akong baba samtang nagluhod sa altar sa simbahan ni Snr. Santo Niño. “Apan pasayloa ako tungod kay wala akoy laing nahunahunaan gawas niini,” nako pa samtang nagpadayon sa pagluhod.

Unya wala ko kapugngi ang pagkurog sa akong kamot nga nagkomkom sa mga tabletas nga bag-ohay pa nakong napalit dapit sa may carbon. Gamiton ko kini inig abot nako sa among pinuy-anan ug ipatumar sa akong asawa aron makuha ang bata nga anaa sa iyang sabakan.

Tulo na ka bulan nga nagbarubos si Sarah, ikaupat kini namo nga anak kung among pakatawhon. Nagpangidaron pa lamang og upat ka tuig ang kamaguwangan namong anak, tulo ka tuig ang manghod ug duha usab ang kamanghuran. Pulos pa kini nanginahanglan sa igong pag-atiman gikan namong mga ginikanan.

Apan ang labaw kong gikabalak-an nga pipila na lamang ka mga adlaw ug mahuman na usab ang kontrata sa akong gitrabahoan.

Akong napanghilantawan ang umaabot namong kagutom ug kalisod sa pinansyal kung wala na akoy trabaho. Mosamot pa gayod kalisod kung mahimugso ang maong bata.

Unya samtang nagpadayon ako pag-ampo sa panghinaot nga pasayloon ako sa Diyos ning dili tiaw kong laraw, may misugat sa akong panan-aw nga nakahatag kanakog dakong pagtagad. Usa kini ka lalaki nga nagdunghay ang taas niyang buhok apan may pagkayagpison og lawas. Aduna usab siya’y tag-as nga bungot. Pamilyar kaayo kanako ang maong bayhon.

Ingon sa wala usab ako makasabot sa akong gibati samtang nagsud-ong niining tawhana. Masulob-on kaayo iyang hitsura, hinay kaayo siyang naglakaw paingon sa gawas ug miagi sa wala nga bahin ning simbahan. Ingon sa gikumot akong dughan apan daw molukso sa tumang kalipay ang akong kasingkasing nga nagtan-aw kaniya.

Mibarog ako gikan sa pagluhod aron sundan ang maong tawo, apan sa usa lamang nako ka pamilok nahanaw siya.

Gilibot ko sa pagsusi ang tibuok simbahan ug wala ko na gayod hikit-i pa ang misteryosong tawo.

Paglingi ko sa akong kilid maoy misugat sa akong mga mata ang Hesukriso nga gilansang sa krus nga anaa sa kilid ug sulod ning simbahan.

Dako akong kahingangha dihang misugat na usab sa akong panan-aw ang Hesukristo nga anaa sa krus sanglit mao gayud kining dagwaya niadtong misteryosong tawo ug wala gayo’y kalahian.

Nabuhian ko ang mga tabletas pangpalaglag gikan sa akong mga kamot. Unya midali ako pagluhod og balik sa sulod ug misaad sa Diyos nga dili na ako mosubli pa. (Kataposan)

ADUNA AKO AKONG APAN DIYOS INGON SANTO NI UNYA WALA
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with