Bumper to bumper

Kid, sayo og uli ha, mipasidaan ang iyang asawa, "kay birthday sa akong amiga ug paadtoon gyud kuno ta." "Asa man dapit ang ilaha?"

 "Sa Fairview, ngano man?"

"Wala, kaya lang, trapik kaayo rong hapon hangtod na sa gabii labi na diri sa Sucat hangtod sa C5. Usahay makahunahuna na lang ko nga mamauli na lang ta sa Cebu kay wa kaayo trapik."

"Aw, kun mao nay imong gusto, okey lang ako, pero ang imong trabaho dinhi, imong biyaan?"

"Biyaan gyud, kay ngano man diay kun magpa-transper ko sa Cebu, total may bag-o man tang branch didto."

"Hunahunaa og maayo, Kid, kay anugon kaayo ang imong promosyon dinhi."

"Na, hala, adto na 'ko kay ma-late unya ko basta paninguhaon ko nga maka-uli ko'g sayo. I'll not promise but I'll do my best," dayong sakay ni Kid sa iyang kotse.

Didto sa iyang opisina sa Parañaque, gihunahuna og maayo ni Kid kun magpabalhin ba siya sa bag-o nilang branch sa Cebu.

"Bahala na," matud ni Kid sa kaugalingon, "humanon ko na lang ning tuiga, una ko magpabalhin sa Cebu."

Alas singko sa hapon, sakay na siya sa iyang kotse pauli sa balay nga iyang gi-abangan sa San Lorenzo Village. Sa iyang pag-abot sa Sukat, "Hesus!" matud niya sa kaugalingon. "Bumper to bumper na man sab ni. Di mi kaadto si Lormel sa birthday sa iyang amiga niini."

Tuod man, alas 10 sa gabii miabot sa balay si Kid ug hikit-an niya sa lamisa ang note nga gibilin sa iyang asawa. Wala madugay, mi-ring ang telepono, iya kining gipunit. "Hello!"

"Kid, mitawag ko nimo sa opisina, nakalakaw kana kuno, matud sa sekretarya. Mitawag ko sa imong selpon, sige og ring apan way mitubag."

"Nakalimtan nako, Lor ang akong selpon tua sa drawer sa akong lamisa."

"Sige, Kid, mouli na ko," dayong butang niini sa telepono.

Tungod sa kakapoy, tulog na si Kid pag-abot ni Lormel. Human niya'g ilis, mitupad siya sa iyang bana. Gihaplos niya ang ilong niini, dayon gihagkan niya sa liog, unya iya kining gihunghongan. Ug sa tumang kaparaygon, "Kid, wa na koy panty."

Miungol una og kadiyut si Kid, dayon misulti sa hinay nga tingog. "Sige, tulog ka na, kay palit ta ugma."

Nagbagulbol si Lormel, "Abi nako'g bumper to bumper ta karon!"

Nadungog kini ni Kid nga mitubag og hinay, "Kapoy kaayo ko Lor sa bumper to bumper karong hapon. Unya na lang ta kaadlawon mag-bumper to bumper." (Katapusan)