Manyak

Gula 6

Nakahilak si Rowena human niya madungog ang gisulti sa floor manager nga siya ang makabayad sa tanan unta nga bayranan sa iyang customer nga wala mobayad sa iyang obligasyon.

Nahuna-huna niya nga gipahimuslan pa siya’g maayo sa iyang customer nga nagtagbaw og maayo sa iyang kauhaw sa babaye, apan gibiyaan ra siya nga nahinanok sa kakapoy tungod sa ilang gihimo didto sa private room.

Miabut g’yud og P2,100 ang bayranan nga gipatong kang Rowena kay gawas sa P1,500 nga charge sa private room, nag-order pa man kadto si Fermo og upat ka ladies drink nga bali’g P600. Luhaan pa ang mga mata ni Rowena dihang migawas siya sa Sanciangko’s Wildflower diin didto ang iyang puyo-puyo nga si Bernard nagpaabot kaniya.

Gisuginlan ni Rowena ang iyang puyo-puyo nganong siya naghilak apan gipatoo niya nga dili iyang kagustohan ang nahitabo. Gipatoo niya ang iyang puyo-puyo nga gipugos siya niadtong Fermo nga makighilawas.

Nakapanganti si Bernard nga ipanimalos ang gihimo niadtong Fermo sa iyang puyo-puyo nga dancer. Pait kaayo ang kahimtang ni Rowena tungod kay ang iyang makita sa matag gabii gikan sa iyang allowance nga tag P150, ug sa mga “share” niya sa ladies drinks, ibanan man og bayad niadtong bayranan nga P2,100. Paglabay sa duha ka semana, si Rowena gipahibalo ni Ronnie human sa iyang pagsayaw atubangan sa mga customers nga mibalik si Fermo sa ilang bar.

“Kanang tawo nga nag-inusara nga naglingkod luyo sa haligi Day, kanang nagpangitngit ug nagpayongyong sa iyang kawo, mao na kadtong imong customer nga wala mobayad,” matud ni Ronnie. Dali nga gikuot ni Rowena ang iyang cellphone ug giteksan ang iyang puyo-puyo. Gipahibalo niya nga dia sa bar kadtong tawo nga mipahimulos kaniya.

“Anhaon nako karon dayon,” mi-reply dayon si Bernard. Taud-taud, nakadawat og text message si Rowena gikan ni Bernard nga miabut na siya. Tuod man nakita niya nga misulod si Bernard sa bar. Giduol ni Rowena ang tawo nga nagpangitngit ug nagpayongyong sa iyang kawo. Mao g’yud, si Fermo ang maong tawo. “Hi, Rowena, enjoy ka ba sa atong deyt.”

“Manyak ka nga pagkatawo Fermo ug bastos!,” misingka si Rowena, apan gikataw-an ra siya ni Fermo. Mibayad si Fermo sa iyang nainom nga duha ka botelyang beer ug milakaw. 

Gisunod siya ni Bernard. Wala masayud si Fermo nga si Bernard naghambin og kasuko kaniya.

“Bay, chicks ka?” giduol ni Bernard si Fermo samtang nagpatuo siya nga bugaw apan gikalitan lang niya’g dunggab si Fermo sa dughan. Walay bisan usa ang nakatug-an kun kinsa ang nagpatay ni Fermo. (Kataposan)