Anino sa kulto

Gula 149

Samtang padayong nagdagan ang sakyanan, si Carlo naggambalay sa iyang igsusulti ngadto sa igsoon ni Jimmy. Kinahanglang tabangan niya si Arlin sa pagpasabot niini mahitungod sa ilang tumong sa pagtago sa bata. Gihan-ay niyang daan ang iyang mga detalye.

Paglabay sa kapin sa duha ka takna nga pagbiyahe, nahiabot na sila sa lungsod sa Carmen. Ang balay ni Roding nahimutang duol sa munisipyo sa lungsod. Bungalow type ang balay sa igsoon ni Jimmy. Dakodako gayod nga balay. Bisan kun sa gawas lang kini tan-awon, maila na nga kini hamugaway gayod puy-an sa pamilya nga dili kaayo daghan og anak.

Gikoral og hollow blocks ang palibot sa balay sa kahabugon nga taga dughan sa tawo nga magbarog diin sa ibabaw nanuybo ang gipangbuak nga mga bildo. Serado ang balay nga hinimo sa kahoy ug semento. Ang bentana nga jalousie may rehas nga puthaw sa gawas nga bahin.

“I think it’s safe here,” nagkanayon si Carlo ngadto kang Maj. Campo tapos masuhid ang palibot nga nahimutangan sa balay.

“Yes,” uyon ni Maj. Campo nga nanghimolsa sa karsones niini samtang mianinaw usab sa palibot. “I think so.”

Sa sala, giabiabi sila ni Roding. Mao ray misulod sa balay sila si Arlin, Carlo, Maj. Campo ug Inday Shantal. Ang upat ka polis nga ilang kuyog nagpabilin didto sa gawas. Mianinaw sila sa palibot nga ingon sa nabag-ohan sa mga talan-awon sa dapit nga nataakan.

Nanglingkod sila sa halapad nga sopa. Si Roding misugo sa katabang sa pag-andam og esnakunon alang kanila.

“Si Ate Chona?” Gipangita ni Arlin ang asawa ni Roding.

“Tua sa iyang trabaho,” tubag ni Roding nga migawosgawos ni Inday Shantal. “Day off nako ron.”

Wala maglangan si Arlin. Gipaila niya sila si Carlo ug Maj. Campo ngadto kang Roding. Gipig-it ni Roding ang kamot sa detektib ug sa hepe. Sa unang higayon, namatikdan ni Carlo nga may pagka-estrikto si Roding apan mahigalaon kini. -- Sumpayan pa