Hinog sa punoan - Gula 54

Misamot pa gayod ang kakulba ni Urielle sa dihang gipalong ni Patrick ang sugang dagitabnon sulod sa lawak ug mao na lamay nagpabiling nagsiga ang lampshade nga nagsabwag og unaop nga kahayag. Unya naigking siya dihang milingkod si Patrick sa ngilit sa iyang gihigdaan nga midip-ig og diyotay kaniya.

“Good night, Honey,” mihunghong si Patrick kaniya. Bisan nagbukot siya sa habol apan nadungog niya ang mga pulong nga gilitok sa lalaki.

Nasayod kaha si Patrick nga nagmata pa siya? Nakapangutana siya sa hilom sa iyang kaugalingon.

 Mitindog si Patrick. Gipanid-an ni Urielle kun unsay sunod buhaton niini. Sa iyang paminaw, mipaingon ang lalaki ngadto sa pikas katre ug mihigda. Wala kini modulog kaniya! Mibatig kahibulong si Urielle.

Nagpadayon gayod sa pagpaniid si Urielle. Apan dangtan og pipila ka gutlo, iyang nabati nga naghagok na si Patrick. Nakatulog na kini. Mora’g nahawan ang iyang gibati. Wala madugay, siya na usab ang giganoy sa katulogon.

Pagmata ni Urielle nianang pagkabuntag, naligo siya. Natulog pa si Patrick sa dayon niyang sulod sa banyo. Gipasagdan lang kini niyang matulog. Dugay ra ba kining mibalik sa ilang kuwarto kagabii. Ambot nag-unsa kini didto sa coffee shoppe sa hotel nga ilang giistaran. -- Sumpayan pa