Gahom sa pasaylo

Ikatulo na ron ka adlaw niya sa hospital. Naluya na si Layla sa sigi og utong’utong, apan wala gyud mahimugso ang iyang gimabdos.

Mabinantayon man unta siya sa iyang panlihoklihok. Wala siyay palta sa pagduaw sa doktora sa pagpa-anak nga maoy nag-monitor sa iyang gimabdos. Normal ang kahimtang sa bata diha sa iyang tago-angkan. Wala siyay gimulo nga mga sakit-sakit sa lawas. Gituman niya ang pag-ehersisyo ug paglikay sa mga pagka-on nga gidili. Nahibulong siya nganong naingon niini kalisud ang iyang pagpanganak.

Naumol sa hunahuna ni Layla ang kabalaka nga kun kining iyang kalisud sa pagpanganak maoy iyang ikamatay, kinahanglan nga makapangayo siya og pasaylo sa iyang amahan. Gihinginlan siya sa iyang amahan dihang nasayud kini nga nagpakasal siya sa hilom ni Ramon.

Gipatawag ni Layla ang iyang amahan, nga nagpa-abot lang diay nga sangpiton kay gibati na usab og kahingawa human kini makamatngon nga may sayop sab diay siya nga nahimo ngadto sa iyang anak.

Nag-atubang ang amahan ug anak. "Pasayloa ko Pa, sa pagsupak sa imong pangandoy nga maka'umagad og ma-arang'arang og kahimtang. Gibalibaran ko ang pangulitawo sa anak sa atong mayor, nga suod mong higala. Imong gikaguol pag-ayo ang akong pagbalibad. Gisayangan ka sa maong higayon. Wala nimo hunahunaa nga ang anak sa mayor sa atong lungsod wala makahuman sa kolehiyo tungod sa katapulan magtu-on. Barkada maoy gi-atiman. Pamustura lay gaayo."

"Nagpakasal kami si Ramon sa Huwes sa siyudad sa Sugbo. Nakuha namo ang tanan nga dokumento nga gikinahanglan aron kami makasal. Tungod kay bayente kuwatro anyos na ang among panuigon, wala na kami pugsa sa paghatag og mga sertipikasyon sa pagtugot sa ginikanan. Gipakaslan ko si Ramon bisan og anak lang siya og usa ka'manananggot. Diha kaniya nakita ko ang kinaiya sa lalaki nga akong unongan. Si Ramon kugihan, mahadlokon sa Diyos, may panglantaw sa kaugmaon ug hait og salabotan. Nakahuman sa kolehiyo, pinaagi sa kaugalingong paninguha. Labaw sa tanan, nagkahigugmaay kami sa usag-usa." "Wala dinhi si Ramon Pa! Wala nimo hi'abti. Dili pa gyud dugay nga nakalakaw. Day-off unta niya karon, apan gitawagan siya sa radyo sa iyang daku nga pareporton, kay may problema sa planta nga iyang gitraba a...." Wala matiwas ni Layla ang iyang gisulti. Miping-it sa kasakit sa iyang tiyan. Gidali pagdala sa delivery room.

Sa pribadong lawak ni Layla, nagkaestoryahay na sad ang amahan ug anak.

"Pa, salamat nga wala mo pakyasa ang akong hangyo nga imo akong duawon dinhi sa hospital. Na-amgohan ko ang gahom sa imong pasaylo. Kadali ra ug walay gibating kalisud sa akong pagpahimugso sa imong unang apo." (Katapusan)