Ang manaygonay

Ibabaw sa terrace sa iyang baye nabati ni Katrina ang paskohanong awit gikan sa manaygon nga naalihan sa gate sa ilang pinuy-anan. Bisan tuod og dili siya makakita kanila apan sa mga tingog niini maila silang mga pundok sa mga bata.

"Pastilan ning mga bat-ana mga tulo pa lang gani ka adlaw gikan silang namasko ania na sab. Pero sige lang kay malingaw man sab ko’ng maminaw kanila ug di man moreklamo bisan pilay akong ihatag," ni Katrina pa sa iyang kaugalingon nga nahunong sa iyang pagbasa sa mantalaang The Freeman.

Mikanaug si Katrina sa dihang nahuman na ang kanta sa mga bata ug gipahatag sa iyang katabang ang diyes pesos ngadto sa nanaygon nga sa iyang banabana nagpanuigon pa sila’g diyes ngadto sa dose anyos. "Igo na kanang sinsilyo nga makalipay kanila Inday. Ayaw lang gyud sila badlonga kun manaygon sa ato kay malingaw man sab ko sa ilang kanta," matud ni Katrina ngadto sa iyang katabang nga daling mituman sa iyang sugo.

"Magsige na unya na silag balik-balik panaygon diri Mam kay maanad nga dili balibaran," sa katabang pa tapos gitunol sa mga bata ang gipahatag sa iyang masinabutong agawon.

"Ay, pasagdi lang Inday kay panahon sa pasko na baya karon ug kausa ra sa usa ka tuig nga magsaulog ta ning maong okasyon." Pahayag ni Katrina nga mipahiyom lang sa wa pag-uyon sa katabang.

Lomalargahay sa gawas si Katrina ug gahuwat nalang sa iyang mga papeles alang sa iyang biyahe sa gawas diin atua ang iyang bana nagtrabaho.

Usa ka gabii niana, duha ka wa mailhing tawo ang mikatkat sa paril nga naglibot sa balay ni Katrina. Di pa halawom ang kagabhion ug gipahimuslan lang nga naponder ang suga sa poste duol sa balay ni Katrina hinungdan sa kangitngit sa maong dapit.

"Way mosinggit ha kundi gustong masakitan!" maisogong pahimangno sa usa ka mga tulisan nga armado’g kutsilyo ngadto ni Katrina ug sa katabang niini nga nakalitan samtang nagtan-aw sa salida sa telebisyon.

Gigapos dayon sila sa duha ka dautang tawo human makuha ang mga alahas ug salapi ug daling mipaingon sa gate. Apan sa dihang mogawas na unta sila, maoy misugat kanila ang mga polis nga nagtion na sa ilang mga armas ngadto sa mga tulisan.

Tapos kabadbari sa gapos si Katrina ug ang katabang niini, gihatud nila ang kapolisan nga naggunit sa duha ka mga tulisan ngadto sa may gate sa ilang gipuy-an.

Sa dihang nakalarga na ang mga polis, tulo ka mga bata ang miduol kanila.

"Kami ang misumbong sa mga polis Mam. Nakit-an namo silang mikatkat sa inyong paril kaganiha. Maayo kay may miaging patrol car sa mga polis nga amoa dayong gipahunong ug gisultihan sa gibuhat niadtong duha ka tawo."

Wa kapugngi ni Katrina ang iyang gibating kalipay ug gigakos ang mga bata ug nagpasalamat kanila.

"Unya sa adlaw sa pasko balik nya mo diri kay aduna koy ihatag kaninyong makalipay sa inyong pamilya," matud ni Katrina nga kahilakong mihapohap sa ulo sa mga batang nanamilit kaniya kay mopauli na. (Kataposan)