Gula 33
Ang konsehal sa lungsod nga gibanatan ni Ricky sa iyang tulumanon sa radyo mao si Dalmacio Anoria. Numero unong konsehal si Anoria sa ilang lungsod. Gidakop kini sa mga sakop sa Mobile Patrol ug Special Weapons and Tactics kay nasakpan sa akto nga mikuyog sa mga trabahante niini nga nagkarga’g bas sa duha ka dumptruck nga gipanag-iya sab sa maong konsehal. Gidudahan nga ang bas nga gikarga sa duha ka dumptruck gamiton alang sa buhatan niini og hollow blocks.
Giatake’g maayo ni Ricky ang maong konsehal sa iyang tulumanon sa radyo. Hait kaayo ang iyang mga komentaryo batok sa maong konsehal. Mora siya’g nangasaba sa kahanginan. Gisaway niya ang binuhatan sa konsehal nga makadaot sa kinaiyahan. Gikondenar niya ang maong buhat sa konsehal sanglit wala man kini gihuptang permit sa pagpangubkob og bas sa ilang lungsod.
Human sa iyang pagpangomentaryo sa abusadong konsehal, mao na usay iyang gituki ang lain pang mga anomaliya sa mayor sa ilang lungsod. Iyang gibutyag ang uban pang mga proyekto niini diin klarong nakabenepisyo kini pag-ayo. Gihisgotan ni Ricky ang overpriced nga pagtukod sa ilang bag-ong merkado publiko, sa anomalosong pagkongkreto sa karsada nga mitadlas sa lungsod ug uban pang dagkong mga proyekto. -- Sumpayan pa