Lovers in Pari-an

Gusto na kong magminyo na kini si John Henry,” dugang pasabot ni Atty. Gumera. “Wa ko magpili og babaye nga iyang higugmaon. Gusto lang kong makaseguro nga tinud-anay nga nahigugma kaniya ang iyang mapangasawa ug dili kay ang amo rang katigayonan ang apson niini. Mao nga gihimo namo kining maong drama. Nagtakoban siya sa pagka-drayber ug ako mangulitawo usab sa babaye nga iyang magustohan. Apil niining maong drama si Tasing.”

“Mao kana ang tinuod, Ros,” ni John Henry pa. “Dili tinuod nga gustong mangasawa nimo si Papa. Iya ka lang gisulayan.”

“Belib ko sa imong baroganan, Hija,” ni Atty. Gumera pa. “Dili ka hangol sa bahandi. Karon, dili na gyud ko mosugot nga balibaran mo pa ang akong itanyag kanimo.”

“Nga unsa?” Nakapangutana si Rosalinda.

“Nga pakaslan mo si John Henry,” ni Atty. Gumera.

Sa nadungog ni Rosalinda, misugwak sa iyang dughan ang kalipay. Naggakos sila si John Henry sa atubangan ni Atty. Gumera nga mahimut-ong nagtan-aw kanila.

“Ikaw, ha, ni Rosalinda pa dihang didto na sila sa lawak sa ulitawo sa taas sa balay. “Nganong wa ka man gyud magsulti nga dili diay ikaw si Bongkoy? John Henry ka man diay’ng dako.” -- Taposon sunod gula