Gula 106
“Apan wa pa koy ikabayad sa maong kantidad sa pagkakaron, Atorni,” nagduko samtang namulong si Rosalinda. “I-ikaw mismo nasayod kun pila ray akong suweldo dinhi. Dili kini paigong ibayad sa akong nautang.
“Dili na kana akong problema. Pangitai kana’g paagi. Hatagan ko ikaw og duha ka semana sa pagbayad sa imong utang. Kun dili ka makabayad, kinahanglang magpakasal ka na gayod kanako, sa mosugot ka’g sa dili.”
Nabalaka pag-ayo si Rosalinda. Giapiki na gayod siya’g maayo ni Atty. Gumera aron mapugos siya pagsanong sa tanyag niini. Unsay iyang buhaton?
Paghiuli ni Bongkoy nianang pagkahapon, nangita gayod og paagi si Rosalinda nga magkasulti sila. Gitug-anan niya si Bongkoy bahin sa gisulti ni Atty. Gumera kaniya. Mibati og tumang kabalaka ang ulitawo.
“Unsa may atong buhaton karon?” Gikapyotan sa kabalisa ang tingog ni Rosalinda. “Dili ko magpakasal niya, Bongkoy. Bahala na. Maghikog na lang ko kun pugson gayod ako sa pagpakasal kaniya.”
“Usa ray sulbad niining tanan, Ros,” ni Bongkoy.
“U-unsa man? Sultihi ko, Bongkoy. Unsa ang nahunahunaan mong paagi.”
“Manglayas kita gikan ning dapita.”
“U-unsa?” -- Sumpayan pa