Lovers in Pari-an

Gula 104

Daklit nga nagtinutokay sila si Rosalinda ug Tasing. Unya gisenyasan ni Tasing si Rosalinda nga tumanon ang mando sa ilang agalon.

Gikulbaan si Rosalinda samtang nagsaka sa hagdanan paingon sa taas. Nakapangutana siya sa iyang kaugalingon kun unsa na man sab kahay tuyo ni Atty. Gumera kaniya.

Paghimuntog niya sa taas, nakita niya si Atty. Gumera nga nagbarog sa tungod sa pultahan sa lawak niini.

“Sulod diri,” giingnan siya niini.

Gikulbaan siya’g maayo dihang nakasulod na siya sa lawak sa iyang agalon.

“M-may tuyo ka nako, Atorni?” Nangutana dayon si Rosalinda sa tuyo nga mahuman dayon ang ilang panagsulti.

“Aduna,” sa abogado pa. “Taas-taas na ang panahon nga gihatag ko kanimong lugway aron pagtimbangtimbang bahin sa akong gitanyag kanimo. Gusto na kong masayod karon, Hija, sa imong desisyon.”

Wala makatingog si Rosalinda. Naglisod siya pagtubag kang Atty. Gumera.

“Gusto kong masayod, Hija,” ni Atty. Gumera pa, “kun andam ka na ba sa pagpakasal kanako.” -- Sumpayan pa