Walay kamatayon ang gugma

Gula 5

Mipadayon si Jody sa pagsulat sa balita atubangan sa computer. Paspas ang iyang pagtulpok sa mga tekla sa computer. Nag-apas siya sa dagan sa panahon. Gitagalan lang siya og 30 minutos sa ilang editor sa pagsulat sa maong estorya. Nakuha na hinuon niya ang kompletong mga detalye sa estorya. Ang kulang na lang mao ang pag-develop niya niini ngadto sa usa ka news story.

Senior reporter si Jody sa Silver Star Daily, ang nag-unang pamantalaan sa dakbayan sa Sugbo. Siya’y sinaligan sa ilang editor, ilabi na sa pagsulat sa kontrobersiyal nga mga balita. Siya kanunay ang magsulat sa banner story sa ilang pamantalaan.

Wala untay gusto si Mr. Luis Garcia, iyang amahan, nga magpadayon siya sa pag-alagad sa Silver Star Daily. May kaugalingon man gud silang publication company nga gipangunayan sa pagdumala sa iyang amahan. Gusto sa iyang amahan nga moluwat na siya sa iyang trabaho isip senior reporter sa Silver Star Daily ug adto na motrabaho sa kaugalingon nilang publikasyon. Misaad si Mr. Garcia nga ihatag ngadto kaniya ang labing taas nga posisyon sa kaugalingon nilang kompaniya. -- Sumpayan pa