Lovers in Pari-an

 Gula 95

Nasayod si Tasing sa ilang gibuhat. Apan mitabang si Tasing paglilong ngadto ni Atty. Gumera sa hilom nilang panagtagbo. Nakasabot si Tasing kanila. Naluoy kini sa ilang kahimtang.

Pero diha gyu’y higayon nga diriyot mabuking si Rosalinda. Nakamata si Atty. Gumera ug nasakpan siya niini nga mosulod na untag balik sa guest room nga maoy katulganan nila ni Tasing. Maayo gani kay nakabunlot dayon siya og pamakak. Gipatuo niya ang iyang agalon nga gikan siyang mitubag sa sugo sa lawas maong mikanaog siya sa silong.

“Mituo kaha to sa imong gisulti?” Nakapangutana si Tasing human niya suginli sa nahitabo.

“Ambot lang kaha, Nang,” ni Rosalinda. “Wa na man sab siya mangutikuti.”

“Lisod ra bang patuohon kanang tawhana, Day. Abogado gud na.”

“Bahala na siya, Nang, kun motuo siya o dili sa akong gisulti.”

“Ang ako lang ba nga basin nagduda na hinuon siya ug panid-an ka na niya matag gabii kun di ka ba mogawas dinhi sa atong katulganan aron makigkita sa hilom ni Bongkoy. Pastilan, kun masakpan mo, lakip ako mahiagom sa kasuko sa atong agawon.” -- Sumpayan pa