Idlas ang katumanan sa gugma
Gula 69
Wala motingog si Lonia. Hangtod karon nagpadayon gihapon si Mike sa paghatag og tips kaniya bahin sa panulat ug kini hilom niyang gikahinangop. Dili gayod selfish si Mike mahitungod sa kahibalo niini sa natad sa panulat.
Wala’y kalainan si Mike kang Rev. Si Rev kanunay usab nga nanudlo kaniya og mga tips sa pagsulat og nobela nga magustohan sa masa.
Pero mora’g napaso ang iyang hunahuna sa iyang pagkahinumdom kang Rev. Dili na diay siya angay maghunahuna sa ulitawo aron dili musamot paglipang ang gitagoan niyang hilom nga pagbati ngadto niini.
Labaw nang dili usab niya angay i-compare si Mike ngadto kang Rev.
“Nakahukom ka na ba, Lonia?” Misukna si Mike pagkilab sa pipila ka daklit.
“B-bahin sa unsa?” Misumbalik pagpangutana si Lonia nga napugwat gikan sa lawom nga paghinuktok.
“Bahin sa gugma nga akong gihalad nimo,” ni Mike pa.
Wala makatingog si Lonia. Ingon sa dili pa siya andam sa pagtubag sa gipangutana niini kaniya. Wala pa niya masuta kun unsa ang matuod niyang gibati ngadto kang Mike.
“Gusto kong masayod sa imong tubag karon, Lonia,” matud ni Mike nga ligdong kaayo ang nawong. “May paglaum ba ang akong gugma?”
Naglisod pagtubag si Lonia. -- Sumpayan pa
- Latest
- Trending
