SUGILANON Ni Remegio L. Mabanag

Kaadlawon, gipakusgan ni Rudy ang paglakaw aron makaabot dayon siya sa balay ni Andoy, iyang ig-agaw, maoy tag-iya ug ang modala sa 'pump boat' nga sakyan sa mga turistang Hapon nga mangadto sa Isla Pandanon.

Nagka-uyon si Rudy ug Andoy, nga ilang pik-apon ang mga turistang Hapon sa mga alas singko sa buntag, didto sa gamay'ng pantalan, sa kilid sa Mactan Hotel. Giplano ni Rudy, nga anaa na sila sa lawod duol sa Isla Pandanon sa dili pa motidli ang adlaw. Gusto niya nga ang mga turistang Hapon; makasaksi sa kaputi sa baybayon nga maggilawgilaw nga matandangan sa silaw sa adlaw sa sayong kabuntagon, makahanggap sa kabugnaw sa huyohoy nga nagagikan sa naglugitom nga kalawran, makalakaw-lakaw sa lapad nga hunasan, makakita sa nagka'lain-laing klase sa isda nga nag'langoylangoy duol sa lapyahan, ug madani sa uban pang talan-awon nga makita sa Isla Pandanon.

Ngitngit pa pag-abot ni Rudy sa balay ni Andoy. Walay timik ang panimalay.

Mipaduol ug mihangad sa bintana si Rudy aron pukawon si Andoy. Dihang sangpiton na unta niya kini, mao hinooy nasawod sa iyang dunggan ang tingog sa asawa niini nga maguwang lang og dyotay sa hagawhaw.

"Hinay-hinay Doy ... nagbinag-o ka man! Sa imong pagdali-dali, naligas na hinoon."

Ang matintalong agumod ug hangos sa magtiayon, nakapagahi gyud sa ... ni Rudy. Wala gani niya hibaw-i nga naggunit na diay siya niini. Apan ang maong kagahi nahumok lang sad dayon. Misakdop ug mipasulabi sa iyang hunahuna nga basin mobalibad si Andoy sa ilang sabot kay gikapoy na kini pagbugwal sa unod sa kalipay diha sa ilawom ug bungdo sa iyang asawa. Nabalaka siya sa mahitabo kun dili niya mapik-ap ang mga turistang Hapon. Matagman siya og mga turista, ug dili lang ang RTM Travel Agency nga iyang gipanag-iya ang madaut kun dili hangtod usab ang turismong industriya sa Sugbo. Kutob sa iyang mahimo dili gayud niya tugotan nga mahitabo ang iyang gikabalak-an.

Mitan-aw si Rudy sa relo diha sa iyang pulso ug naka-ingon sa kaugalingon, "May panahon pa." Busa milingkod siya sa lingkoranan nga may sandiganan diha sa tugkaran aron hulaton na lang si Andoy anus'a manaug. Kun dili kini manaog sa oras nga gitagal sa iyang hunahuna, iya gyud kining sangpiton ug pahinumdoman sa ilang gika-uyonan.

Nakaidlip si Rudy. Mao na lay iyang na-amgohan nga gipik-pik ang iyang abaga ug gipangutana ni Andoy, "Gaw ... Gaw. Ganina karang gahuwat Gaw?"

"Dili pa gyud dugay Gaw .... maoy gyu’y akong pag-abot, dihang naligas," ni Rudy nga gihuwasan sa kabalaka. Dili pa ulahi ang tanan. May panahon pa, alas kuatro imedya pa lang sa kaadlawon. (Kataposan)