Ang pilosopo

Nag-abot ang managhigalang si Osting ug Esko sa usa ka karenderiya sa barangay Punta Princesa usa ka udto niana. "Oy, Ting, baboy na sab ang imong sud-an karon?", ni Esko pa ngadto sa higala niyang tricycle driver.

"Ganahan man gud kong mokaon basta baboy ang isuwa nako sa paniudto 'Ko", tubag ni Osting nga maayo kaayong mikumot-kumot sa kan-on mais nga gisabwan sa sabaw sa humba nga lata.

"Bagaa raba sa tambok anang imong gipili nga humba, 'Ting. Ma-high blood ka ana bay." Nagngising tambag ni Esko sa higala.

"Wa man guy lami 'Ko kun way tambok ang sud-ang baboy. Kabantay ka tingali kun magsuwa ka’g baboy no?" sukot ni Osting nga nagsinaw ang mga ngabil sa mantikaon niyang sud-an.

"Tinuod na 'Ting. Pero maayo gyud nang atong kontrolon ang pagkaon og baboy labi na kun daghang tambok."

"Tuo man ka’g high blood 'Ko. Naa bitaw dihay sige’g control sa ilang pagkaon namatay man sad gihapon. Die today, die tomorrow, the same die rana bay..." pilosopong tubag ni Osting dayong inom sa usa ka botelyang softdrink.

"Kana sang softdrink 'Ting kun palabian padong sad na sa diabetis bay," ni Esko pang nagngisi ug daw gipaagi na lang sa komedya kaha aron di masuko ang higalang pilosopo.

"Pastilan baya nimo 'Ko, madugay hasta tubig di na ko nimo paimnon. Mouna ko nimo bay kay mopahuway pa ko’s balay una mobalik sa pamasahero." Panamilit ni Osting nga medyo nalingaw sa gisulti sa higala nga wa lang niini panumbalinga.

Nanglabay ang mga adlaw, usa ka higayon niana, nakabalita si Esko nga gitabang si Osting kay kalit natumba samtang naghuwat og pasahero sa parkinganan sa mga tricycles.

Gumikan kay may pagkasuod ang ilang panaghigala, dali siyang miagpas sa tambalanan nga gidad-an ni Osting.

"Kumostang kahimtang ni Osting, Day Meling?" sukot ni Esko sa asawa sa iyang higala nga nagtan-aw sa iyang bana nga giatiman sa doctor.

"Anaa, di kalihok ang pikas niyang lawas gumikan sa atake sa high blood," tubag sa asawa nga masulob-ong nagtan-aw sa iyang bana.

Sa dihang migawas si Esko sa tambalanan igo na lang kining nakapanlingo-lingo.

"Intawon sab sa akong amigo, kun naminaw pa lang unta siya sa akong tambag. May pagkapilosopo man sad gud tawhana." Ni Esko pa sa iyang kaugalingon samtang nagsakay sa jeepney pauli sa ilang balay. (Kataposan)