Ulipon sa Gugma

Usa ka higayon niana, nagkasulti sila si Abigail ug Harvey. Seryoso silang nagkabildohay sulod sa usa ka outlet sa Dunkin Donut. Wala mag-ukon-ukon si Harvey sa pagpadayag sa dako niyang pagsupak sa relasyon nilang Abigail ug Michael.

“Dili siya angay nimo, Abigail,” nagkanayon si Harvey.

“Nganong nakasulti ka man og ingon niana?” Nangutana si Abigail.

“Tungod kay dili kamo pareson. Buotan ka nga pagka-babaye. Samtang si Michael, usa siya ka lalaki nga dili maayo’g reputasyon sa atong tulonghaan. Ikaw mismo nasayod niana.”

“Tinuod kana. Pero nisaad na siyang magbag-o.”

“Ug mituo ka lang usab dayon sa iyang gisulti?”

“Ug unsa man ang gusto mo nga akong buhaton?”

“Nikonsulta ka unta nako sa wala ka pa mopakanaog og desisyon. Isip imong higala, andam kong motambag nimo aron dili ka maalaot.”

“May limitations kita isip managhigala, Harvey. Ug I think wa ka nay katungod sa pagpanghilabot sa akong kinabuhi in terms of love life.”

“A-Abigail...”

“Salamat na lang sa imong concern. Ayaw kabalaka. Kun unsay mamahimong linugdangan ning pagpakigrelasyon ko kang Michael, ipasalig ko kanimo nga dili ko kini pagabasolan. Ug hangyoon ko sab ikaw nga ayaw hukmi ang pagkatawo ni Michael. Pareho baya mong lalaki.”

Wala makatingog si Harvey.

Sukad niadtong higayona, wala na gyud magkasulti pag-usab sila si Abigail ug Harvey.

Nagpadayon ang relasyon nila ni Abigail ug Michael. Bisan kanunay silang magkita sa tulonghaan, magkanunayan usab si Michael sa boarding house ni Abigail. Misamot ang kahugot sa ilang bonding isip managtrato.

Pero nunot sa pagpanglabay sa mga adlaw, nasuta ni Abigail nga wala pa gihapon siya makakat-on sa paghigugma kang Michael. Si Harvey pa gihapon ang gipitik sa iyang kasingkasing.

Hangtod nga miabot ang higayon nga dili na siya malipayon sa relasyon nila ni Michael. Dili na niya mahimo ang pagpaka-aron-ingnon. Gikapoy na siya sa relasyon nga walay gugma nga nagbugkos.

“Magbuwag na ta, Michael,” nagkanayon si Abigail usa ka higayon niana nga nagkasulti sila sulod sa canteen sa tulonghaan.

Nakugang si Michael sa kakalit sa desisyon ni Abigail. -- Sumpayan pa