Ulipon sa Gugma

Namula ang aping ni Abigail nga naigo sa kusog nga pagtamparos ni Krista kaniya. Mibati’g kasakit si Abigail sa gibuhat ni Krista.

Ang pagtamparos ni Krista kang Abigail nakadapit sa pagtagad sa mga estudyante nga nakasaksi sa nahitabo. Gitan-aw sila sa mga estudyante nga gustong mangusyoso kanila.

“Unsa bay imong problema?” Gipangutana ni Abigail si Krista. “Unsa bay akong sala nga imo man dayon kong gisagpa?”

“Mangutana ka pag ngano?” Gitulisok siya ni Krista. “May nagsulti nako nga nagkuyog mo si Harvey kagabii nga nangaon sa Food Park!”

“U-unsa?”

“Bigaon kang dako!”

“Unsa ba diay gisulti sa imong source sa kasayoran nga miulbo man pag-ayo ang imong kaspa? Nangaon ra man kaha mi si Harvey? Angay mo na ba diay kanang ikasuko?”

“Di ba giingnan ko na man ikaw nga likayan mo si Harvey?”

“Ngano bang mora ka man og insecured kaayo? Wa ba diay nimo ma-feel nga nahigugma si Harvey nimo maong naingon ka niana?”

Ingon sa misamot ang kalagot ni Krista tungod sa gisulti ni Abigail. Dihadiha midasmag si Krista kang Abigail. Maayo gani kay abtik nga milikay si Abigail. Ug dihang midasmag pag-usab si Krista kaniya, nahiabot ang usa ka security guard nga abtik kaayong mipugong sa dalaga nga nagbahis sulod sa school campus.

Dihang naudto, gipatawag sa registrar sila si Abigail ug Krista aron sila husayon. Apan wala mopatim-aw si Krista sa office sa school registrar. Si Abigail ray nagpakita didto. Gipahunat siya sa registrar kun unsay iyang plano mahitungod sa gibuhat ni Krista kaniya.

“Gusto kong mosaad si Krista nga dili na niya usbon ang pagpasakit nako, Mrs. Amburgo,” giingnan ni Abigail ang registrar. “Kun mousab pa gani siya, ikiha ko na siya!”

“Ayaw kabalaka, Miss Jacob,” matud sa registrar. “Dili maka-report si Miss Krista Cosim sa iyang klase sa tanan niyang mga subject hangtod nga dili siya makig-atubang kanako to explain on her side.”

Paggawas ni Abigail sa office sa school registrar, maoy iyang nakita si Harvey nga nagbarog sa gawas sa pultahan sa buhatan sa registrar. Gusto siyang molikay sa ulitawo apan nagunitan niini ang iyang bukton.

“Buhii ko, please!” May kalagot ang sinultihan ni Abigail. -- Sumpayan pa