Awit nga gitagik sa usa ka ungo

Usa ka magtatagik si Fernando ug sa iyang pagka magtatagik daghan ang midayeg kaniya. Gani daghan usab sa mga inilang mag-aawit nga nakadayeg kang Fernando labi na nga ang iyang tinagik maoy ilang kantahon ning maong mag-aawit.

Bisan sa mga negosyante nga mahiligon sa mga binisayang mga awit, ang tinagik gyod ni Fernando ang ilang ipatugtog sa higayon nga duna silay nga tigum o mga seminar. Ug dili lang kay kana ra, may hilom pa gyod nga nahigugma kang Fernando ug kini mao si Margarita nga anak sa usa ka adunahang magpapatigayon sa siyudad kay kausa niana nakita man niya si Fernando sa usa ka linawas gayod dihang kini maoy midaog sa usa ka Popular Musical Festival nga gipasiugdahan sa probinsiya.

Apan walay pagbati si Fernando kang Margarita kay didto man siya mahigugma kang Miraluna. Usa ka magtutudlo sa Kindergarten. Matag hapon iya gyong adtoon ni Fernando si Miraluna sa eskuylahan niini diin kini magtudlo.

"Kanang, Fernando, ayaw na lang ko anhia dinhi, ha, kay duna may moanhi nako dinhi," ni Miraluna pa   nga wala motan-aw sa ulitawo.

"Du-dunay moanhi nimo dinhi, ki-kinsa man, ha, Mira?" gusto ni Fernando nga mahibawo siya aron dili na siya mobalik dinhi sa eskuylahan diin magtudlo ang dalaga.

"Si ... si Roderick, akong uyab," tubag ni Miraluna.

Sa pagkabati ni Fernando sa gisulti ni Miraluna nga duna diay hinigugma ang dalaga, wala kapugngi sa ulitawo ang iyang mga luha ug dayon nananghid kini nga molakaw na.

Ug sukad niadtong adlawa, wala na gyod mopatim-aw pa si Fernando sa eskuylahan diin magtudlo ang dalaga. Unya usa ka makapakitbi sa atay ang balita nga ang uyab ni Miraluna nga si Roderick gipatay ug grabe kaayo pagkakuniskunis sa lawas niini nga mora’g mas labaw pa sa usa ka bangis nga hayop sa lasang ang mibuhat niini. Naguol pag-ayo ang dalaga sa nahitabo sa iyang uyab. Unya, gisundan pa gyod kini og daghan pang mga makapahibulong nga hitabo, kay sa matag mahimong hinigugma ni Miraluna mahiagom gyod sa kamatayon sama sa nahitabo sa uban pang mga uyab ni Miraluna.

"Miraluna, komusta ka na?" hinay ang tingog ni Fernando nga mitimbaya sa dalaga dihang nagkasugat sila sulod sa usa ka Mall.

"Nia, mao lang gihapon, ug mahadlok na dunay manguyab nako, kay patyon man sa usa ka bangis nga mamumuno. Ambot mangtas tingali nga   dunay gusto nako sa hilom ug unya magselos kini kun dunay mahigugma nako," pahayag ni Miraluna. "Ikaw, Fernando, ayaw na lang gyod pagpadayon sa paghalad sa imong gugma nako, kay basin og ikaw ang isunod nga patyon."

Igo lang mipahiyom si Fernando ug namulong: "Miraluna, bisa’g karon dayon kun dunay gustong mopatay nako, sugot ko, basta imo lang ko sugton ug unya higugmaon, bahala nag mamatay ko..."

"Kuyawa god nimo."

"Oo, mao na Miraluna. Kuan diay may awit kong gitagik para nimo ug ang ulohan niini mao ang AKO LANG MOANGKON KANIMO?" Miigham si Fernando. "Sa sunod buwan imo na kining madungog sa estasyon sa radyo ug television. Duna koy kopya nga CD, ihatag ko to nimo..."

Ug wala damha nga inanay nga migitib ang usa ka gugma gikan sa kasingkasing ni Miraluna ngadto kang Fernando. Usa ka gabii dihang mikuyog si Miraluna kang Fernando didto sa ilang balay maoy nakita ni Miraluna si Fernando nga kalit lang nahimong usa ka dakong iro ug miduol kini kaniya ug gitilaptilapan ang aping sa dalaga.

"Miraluna, usa ako ka mangtas nga ungo," ni Fernando pa nga usa na ka iro. (Kataposan)